Një tjetër përfaqësues i lartë në radhët e opozitës dhe Partisë Demokratike u dorëzua përballë situatës së përçarë ku ndodhet forca ku militon. Këshilltari ligjor i grupit parlamentar të PD Marash Logu, ka bërë me dije se ka dhënë dorëheqjen nga posti i tij pa dhënë detaje për arsyen. Megjithatë Logu ka sqaruar se do të vijojë të mbetet anëtar i kësaj partie. Në një postim në rrjetet sociale, Logu tha se është mirënjohës për çdo demokrat për mbështetjen dhe se do të vijojë të japë kontributin e tij si profesionist i ligjit në këtë parti, pavarësisht dorëheqjes.
“Kam paraqitur sot dorëheqjen nga funksioni i këshilltarit ligjor të Grupit Parlamentar të PD-së. Faleminderit lidershipit për besimin dhe secilit prej deputetëve demokratë për bashkëpunimin. Mirënjohës çdo demokrati për mbështetjen dhe dashamirësinë gjatë këtij rrugëtimi. Do të vazhdoj të mbetem anëtar i PD-së dhe të kontribuoj si profesionist i ligjit në familjen tonë politike”, shkroi Marash Logu.
