Gjatë fjalës së tij në punimet e Asamblesë Kombëtare, kreu i Partisë Agrare Ambientaliste, Agron Duka shpjegoi pozicionimin e forcës së tij politike në zgjedhjet vendore të 14 majit.
Duka u shpreh se PAA është në opozitë dhe vota do të shkojë për kandidatët e kampit opozitar. Por ai theksoi se Agrarët do të garojnë më vete dhe vetëm për këshillat bashkiakë.
“Ju e dini se Partia Agrare Ambientaliste është një parti e qendrës dhe ka qenë pjesë e koalicioneve të ndryshme bazuar jo në pazare por në projekte dhe kauza politike si dhe kauza specifike që përfaqëson partia jonë siç janë çështje të mjedisit dhe bujqësisë”, tha Duka.
Agron Duka shpjegoi se përse për PAA, këshillat bashkiakë janë të rëndësishëm.
“Gara jonë për këshillat bashkiakë është një përgjegjësi e madhe për ne si parti pasi do të masim forcat tona në një realitet politik vërtet agresiv, për arsye që tashmë dihen. Pushteti vendor zotërohet nga një forcë e vetme politike dhe ne si parti futemi në kushte të pafavorshme”, tha Duka.
Në mënyrë të posaçme Agron Duka u ndal në garën për Bashkinë Durrës.
“Durrësi është një Bashki për të cilën Partia Agrare Ambientaliste e do të mundohet me të gjitha forcat në përkrahje të kandidatit të opozitës zotit Igli Cara”, u shpreh Duka.
m.b./dita
