Gazetari Eni Ferhati raportoi se sipas informacioneve të siguruara, mbrojtjes së kryebashkiakut Erion Veliaj do t’i shtohet një avokat i ardhur nga Amerika.
Ai nuk përmendi emër por sipas burimeve afër kryebashkiakut bëhet fjalë për Marc Elliot Kasowitz, avokat i profilit të lartë në SHBA.
I datëlindjes 1952 ai është avokat amerikan dhe partner i firmës ligjore me bazë në Nju Jork, Kasowitz Benson Torres, të cilën ai e themeloi në vitin 1993.
Një përfaqësues i studios së Kasowitz ka mbërritur sot në Durrës. Ai quhet Joshua Roberts.
Kasowitz ka përfaqësuar kompani shumë të njohura në çështje penale dhe civile. Ai ishte avokat i Donald Trump në 2017.
Kasowitz përfaqësoi personalisht Presidentin e SHBA në lidhje me hetimet mbi ndërhyrjen ruse në fushatën presidenciale të Trump në zgjedhjet e vitit 2016 në SHBA.
Gjykata e Posaçme e Apelit ka caktuar datën 11 mars për të shqyrtuar ankimin e kryebashkiakut të Tiranës, Erion Veliaj, ndaj masës së sigurimit arrest me burg.
Seanca do të zhvillohet në orën në orën 10:00 dhe ky ankim do të shqyrtohet nga gjyqtari Engert Pellumbi.
Kryebashkiaku i Tiranës Erion Veliaj u arrestua më 10 shkurt të këtij viti me urdhër të SPAK për disa akuza si shpërdorim detyre, korrupsion, mosdeklarim i pasurisë dhe pastrim parash.
Veliaj është shprehur se është i pafajshëm dhe se arrestimi është i paligjshëm, me qëllim për ta goditur politikisht.
Orët e fundit në media flitet edhe për një “skenar grek”, sipas të cilit prokurori dhe gjykatësi i tij janë njerëz të lidhur me lobin grek që kandidoi Belerin dhe uli Berishën në ceremoninë e Janullatos.
b.s. / dita
