Isuf Kalo, mjek, profesor, publicist dhe figurë e spikatur e historisë së vendit në kapërcyellin midis dy sistemeve, është ndarë nga jeta.
Lajmin e konfirmoi për DITA familja e të ndjerit.
Profesor Kalo po qëndronte prej disa muajsh në gjendje jo të mirë shëndetësore, jashtë Shqipërisë.
Pritet sjellja e trupit në atdhe.
Sipas një amaneti që ka lënë i ndjeri, lamtumira e fundit dhe varrimi do kryhen në vendlindjen e tij, në Luzat, ku ai u lind në 1942.
Redaksia e DITA, ku profesor Kalo publikonte shpesh artikujt e tij, i shpreh ngushëllimet më të sinqerta, familjes, miqve dhe të afërmve.
Jeta dhe vepra
Isuf Kalo lindi në 1942 në Luzat të Tepelenës. Ai u diplomua për Mjekësi në Universitetin e Tiranës në 1964.
Profesor Kalo është specializuar për Diabetologji dhe Endokrinologji në disa vende të Europës. Ai ishte një nga pionierët e këtyre fushave në Shqipëri.
Për disa vjet ai ishte kreu i Endokrinologjisë në Fakultetin e Mjekësisë dhe Qendrën Spitalore Universitare të Tiranës.
Mbante gradën Doktor në Shkencat Mjekësore.
Deri në vitin 1985, doktor Kalo ishte mjeku personal i Enver Hoxhës.
Nga viti 1991 deri në 2004 ai punoi në Organizatën Botërore të Shëndetësisë në Zyrën Rajonale për Europën në Kopenhagen, ku drejtoi Programin Europian për Diabetin dhe më vonë Programin për Cilësinë e Sistemit Shëndetësor, në Europë.
Dr. Kalo është autor i shumë studimeve të publikuara në revistat e profilizuara mjekësore ai dhe anëtar nderi i disa bordeve ndërkombëtare të shoqatave mjekësore në Europë.
DITA
