Gjatë ditëve të fundit janë publikuar pretendime se drejtues të televizionit Top Channel do të paraqiteshin këtë të hënë në Prokurorinë e Posaçme (SPAK), në kuadër të hetimeve që lidhen me shtetasin Ergys Agasi.
Pretendimi ka origjinën nga një faqe në rrjetet sociale me përmbajtje satirike. Më pas, ky informacion u shpërnda përmes komunikimeve private dhe u publikua në rrjetet sociale nga Ç.Peka, sipas të cilit drejtuesja ekzekutive e medias në fjalë ishte thirrur nga SPAK për këtë çështje.
Sipas të dhënave të siguruara nga Vox News, nuk ka asnjë fletëthirrje nga organet e drejtësisë. Shpërndarja e këtij informacioni lidhet me rrethin e zëvendëskryeministres Belinda Balluku, në një kohë kur Top Channel ka transmetuar një seri materialesh me karakter kritik dhe investigues ndaj aktivitetit të saj zyrtar.
Në kuadër të këtyre raportimeve, pretendohej gjithashtu për një koordinim mes Ballukut dhe përfaqësuesve të drejtësisë për lëshimin e fletëthirrjes, pretendim që nuk u konfirmua nga burime zyrtare apo nga komuniteti i gazetarëve.
Në fund të ditës së hënë, nuk pati asnjë paraqitje të drejtuesve të Top Channel pranë ambienteve të SPAK.
Ndërkohë, Top Channel ka vijuar transmetimin e cikleve investiguese mbi vendimmarrjet në dikasteret e drejtuara nga Belinda Balluku, përfshirë edhe hapësirat televizive të emisionit “Fiks Fare” gjatë muajve shtator dhe tetor.
n.s. / dita
