Nga Fatos TARIFA
Botuar në Dita
Edhe vetë Zoti është në hall e s’di ç’të bëjë. Ja i tha Berishës ik dhe ky s’ikën, ç’i mbetet Zotit pas kësaj?!
Ose Berisha, dikur një ateist komunist (jo iluminist), mashtron kur thotë, duke treguar me gisht tavanin, se vetëm Ai lart (jo komshiu i katit të sipërm, por vetë Zoti), e di se kur duhet të ikë (jo nga kjo jetë) por nga politika dhe nga drejtimi i partisë-bajrak që ai vazhdon të drejtojë, ose Zoti, siç dikur thoshte Epikuri, është i pafuqishëm dhe, pra, nuk është Zot i vërtetë.
Pra, o Berisha, o Zoti!
E si mund të pritet që Berisha, kaq krenar edhe kur është, mender, i dh…rë, të pranojë se i ka humbur edhe këto zgjedhje, si shumë të tjera më parë, kur ai nuk i bindet as vullnetit të Zotit. Jo Zotit atje lart, siç e tregon me gisht Berisha, por Zotit Popull!
Zoti lart duket se e ka lënë çyryk, Zoti poshtë, Populli, e ka nxjerre me kohë në pension politik.
Dikush nga të tijët (ata të listave të mbyllura, që tani, pasi e kanë siguruar një karrike në parlament dhe mund të mos i tremben më), duhet t’i kujtojë Berishës se ai nuk është më kreu i bajrakut dhe të përpiqet ta shndërrojë atë bajrak kanunor në një organizatë politike moderne e demokratike.
