Çerekfinalet e Europa League filluan me fitoren 1-0 të Feyenoordit përballë Romës. Takimi i parë u luajt në “De Kuip” dhe u vendos nga perla e Mats Weiffer (54’). Skuadra e Arne Slot shijoi një hakmarrje të ëmbël ndaj verdhekuqve, kundër të cilëve humbën finalen e Conference League të sezonit të kaluar në “Air Albania”. Gjithsesi, hakmarrja e plotë do të vijë nëse sigurohet kualifikimi në gjysmëfinale. Roma humbi një penallti në fundin e pjesës së parë. Lorenzo Pellegrini kishte shansin e artë të kalonte italianët në avantazh, por kapiteni u ndal nga shtylla. Jose Mourinho humbi shërbimet e Paulo Dybala dhe Tammy Abraham për shkaqe dëmtimesh.
Ndërkohë, Gent-West Ham, sfida e parë çerekfinale në Conference League, përfundoi në barazim 1-1. Danny Ings kaloi anglezët në avantazh në minutat shtesë të pjesës së parë. Vendasit reaguan dhe evituan humbjen falë golit të Hugo Cuypers (57’). Belgët tentuan fitoren deri në minutat e fundit, por në dy raste u ndalën nga shtylla.
