Në media ka rrjedhur sot një dëftesë shkollore e z.Olsi Dado, prokurori i SPAK i vendosur në qendër të vëmendjes pasi arrestoi me një hetim rrufe kryetarin e Bashkisë së Tiranës dhe numrin 2 të mazhorancës, Erion Veliaj.
Faqja e njohur investigative Prapaskena, e cila ka botuar këto ditë dokumentacion të bollshëm mbi rastin, ka nxjerrë online mes faksimileve të tjera edhe një dëftesë të zotit Dado kur ka qenë student për drejtësi në 1996.
Bie në sy që notat janë të dobëta dhe mesatare, kurse Kontabilitetin e ka 5. Nota më e ulët kaluese. Por tek kontabiliteti bazohen akuzat kryesore që zoti Dado ka ngritur në rastin e kryebashkiakut të Tiranës.
Me shumë interes publik është pritur shifra e dalë prej tij se bashkëshortja e kryebashkiakut ka shpenzuar 860 mijë euro për veshje online madje gazetarë shumë parimorë dhe seriozë kanë thënë se kjo shifër enorme është shpenzuar për të jashtme dhe të brendshme.
Por bashkëshortja Xoxa e kryebashkiakut, e vendosur edhe kjo nën akuzë nga zoti Dado, thotë se ka shpenzuar në një dekadë rreth 75 mijë euro për porosi online, dhe jo më shumë.
E vërteta po na trazon e po na fut në sherre të egra kafenesh, ndërkohë që sipas përkufizimit zyrtar kontabiliteti është:
“…proces që merret me grumbullimin, përpunimin dhe raportimin e informatave financiare. Kontabiliteti eshte aktivitet sherbyes i dizajnuar për të akumuluar, për të matur dhe për të komunikuar te gjitha informacionet financiare mbi entitetin ekonomik, biznesin dhe organizatat jofitimprurëse”.
Nuk ka ndonjë mëkat me standardin tonë, pasi ne kemi dhe ministra me pesa, madje edhe VIP-a me tituj akademikë plagjiaturë. Por sidoqoftë, lidhur me rastin, na lind pyetja: Nëse është i dobët prokurori në këtë fushë, a janë akuzat e tij, të besueshme jashtë çdo dyshimi?
—-
Shkrimi i faqes investiguese mund të lexohet duke klikuar KËTU
