Në një artikull botuar sot në median amerikane, historia ballkanike e ish-kryeagjentit të FBI, ka marrë përmasa të reja, vërtet befasuese.
Nëse të dhënat e këtij artikulli provohen si të vërteta, rezulton se Charles McGonigal është përfshirë në një skemë shantazhi dhe gjobëvënie në të paktën tre shtete ballkanike dhe shënjeshtra kanë qenë biznesmenët më të mëdhenj shqiptarë.
Që në titull, artikulli pretendon një kthesë të re në skandalin e Charles McGonigal.
“Kurrë më parë nuk ka qenë FBI përballë një skandali të ngjashëm me atë në të cilin është përfshirë Charles McGonigal” – shkruan autori dhe përqëndrohet më pas në pjesën për Shqipërinë, ku thotë se ajo që është zbuluar deri tani nga prokurorët dhe media është “vetëm maja e ajsbergut”.
Më poshtë, pjesë nga shkrimi:
“Për arsye ende të paqarta, McGonigal, të cilit i duheshin para për të paguar jetën e tij të dyfishtë – gruan dhe fëmijët në Uashington DC, si dhe një të dashur të dyshimtë në Nju Jork – filloi të luajë fort në skenën shqiptare për para.
McGonigal ka udhëtuar disa herë në Shqipëri, përfshirë shtatorin e 2017-ës, kur ishte ende zyrtar i lartë i FBI-së. Një raport i ri nga Washington Post zbulon pjesë nga kjo vizitë:
“McGonigal, i cili, asokohe, ishte ende duke punuar për FBI-në, i tha Kryeministrit shqiptar që të mos i jepte leje fitimprurëse shpimi kompanive që ishin fronte për interesat ruse. Ndërsa McGonigal dukej se po vepronte në përputhje me rolin e tij si oficer i kundërzbulimit ndaj ndikimit rus, prokurorët pretendojnë se, në fakt, Neza dhe një shqiptar tjetër që punonte me McGonigal, i identifikuar nga prokurorët si këshilltar joformal i Ramës, kishin interesat e veta financiare në vendburimet e naftës”.
E vërteta është edhe më e rëndë nga sa thotë ky raportim i WP. Është mjaftueshëm e shëmtuar që një zyrtar i lartë i FBI-së të përfshihet për para në mënyrë aspak të këndshme në politikën e brendshme të një aleati të Amerikës. Por ajo që McGonigal bëri gjatë atij udhëtimi fatal në Shqipëri ishte shumë më e keqe nga sa kanë pranuar autoritetet federale ose media.
Gjatë kohës që ndodhej në Shqipëri zyrtari i lartë i FBI-së ka ndërmarrë një operacion zhvatje kundër shqiptarëve të pasur për përfitime personale.
McGonigal u tha një numri shqiptarësh të suksesshëm në biznes, se, së shpejti, ata do përballeshin me sanksione nga ana e SHBA-ve, çfarë do të shkatërronte bizneset e tyre, dhe do rezultonte në sekuestrimin e llogarive të tyre bankare dhe në ndërprerjen e të drejtës së udhëtimeve jashtë vendit. Por McGonigal mund ta zgjidhte këtë problem për një “tarifë modeste” prej disa milionë dollarësh.
Mesazhi ishte i qartë: “Më paguani ose do t’ju shkatërroj jetën!”
Duke marrë parasysh pozicionin e McGonigal në FBI, shumë prej këtyre shqiptarëve e morën seriozisht kërcënimin e tij, dhe mjaft syresh e paguan. Disa paguan “vetëm” 3 milionë euro. Të tjerët paguan shumë më tepër.
Sipas burimeve, McGonigal goditi rëndë Shefqet Kastratin, manjatin e naftës në Shqipëri, duke i marrë 12 milionë euro (me vlerë afro 15 milionë dollarë në 2017).
Burimet në Ballkan thonë se përfitimi i McGonigal nga kjo lojë ishte rreth 30 milionë euro, por me sa duket shuma u nda me partnerët e tij shqiptarë…
Gjithashtu sipas këtyre burimeve, McGonigal tentoi të godiste me operacione të ngjashme në fqinjët e Shqipërisë, në Maqedoninë e Veriut dhe në Mal të Zi, ku ndodhen pakica shqiptare (në shifra) domethënëse.
Ky është skandali më i rëndë në historinë e gjatë të FBI-së. Për të duhet hetim i menjëhershëm nga Kongresi. Ajo për çfarë Departamenti i Drejtësisë ka paditur McGonigal duket si maja e vogël e një ajsbergu ballkanik jashtëzakonisht të korruptuar…”
Media ku është botuar ky artikull quhet The Washington Examiner. Është një revistë javore amerikane, e vendosur në Uashington, D.C.
Nga viti 2005 deri në mesin e 2013, Examiner botohej në bazë ditore dhe shpërndahej në të gjithë zonën e metrosë në Uashington, D.C. Fokusi i saj ishin lajmet lokale dhe komentet politike.
Pas dixhitalizimit të saj në 2013-ën, Examiner filloi të fokusohej pothuajse tërësisht në politikën kombëtare, nga një këndvështrim konservator, dhe të ofrohej në një format më të zgjeruar.
Autori i artikullit, pjesë nga i cili janë botuar në DITA është John R. Schindler. Ai prezantohet në fund të artikullit si person që ka shërbyer në Agjencinë e Sigurisë Kombëtare si analist i lartë i inteligjencës dhe si oficer kundërzbulimi.
Të dhënat e artikullit mbeten për t’u verifikuar.
Dita
