Pas grushtit të djeshëm në këshillin bashkiak, ka shpërthyer fantazia e shfrenuar e partisë së Sali Berishës dhe Ilir Metës.
Ndërsa një ditë më parë, mbështetësit mediatikë, ishin në delir, pasi match-in e boksit ndaj Halit Valterit, pinjollit të një atentati të njohur, e kishte fituat Tedi Blushi, që sipas tyre na dolli i fortë, sot fabula ka ndryshuar.
Pikërisht si pasojë e nisjes së procedimit penal, që Halit Valteri, ka dërguar tek autoritetet përkatëse ndaj Tedi Blushit.
Ndërkohë që krahu i djathtë i Metës, thotë se ka pasur tentativa për ta vrarë me armë zjarri brenda sallës së këshillit, gazetari në median e familjes Berisha, Bledian Koka, shkon edhe më tej, kur shkruan se ka pasur tentativa për të imituar atentatin ndaj Donald Trump në sallën e bashkisë Tiranë.
Koka, shkruan se Veliaj kishte veshur antiplumb, ndërsa në bashki ishin hequr dedektorët e armëve, e bashkia ka fshirë videot e regjistrimit të sallës.
Një përfundim, i dalë dukshëm pa asnjë hetim apo vëzhgim paraprak, në një kohë kur procedimi penal po vijon dhe prokuroria sipas të gjitha gjasave do të hetojë me detaje të gjithë ngjarjen.
Ngjarja e djeshme ishte e thjeshtë : kur po fliste Veliaj, çohet Tedi Blushi dhe i hedh dosjen me letra A4, e donte të dilte në podium. Aty është zënë me këshilltarin Halit Valteri, e drejtuesja e seancës Romina Kuko, ka mbyllur seancën. Kaq ka qenë e gjitha. Ku i nxorën njerëzit e Berishës dhe Metës faktet se është përgatitur atentat apo ka pasur njerëz të armatosur? Ku e dinë se Veliaj ka pasur antiplumb? E gjitha kjo është një logjikë që nuk mbështetet askund, e delirohet në budallallëqe të tilla, të cilat, ose bëhen për të fryrë opinionin me fake news, ose siç thoshte Frrok Çupi vërtet ka një skenar.
Postimi i Bledian Kokës
Pse Erion Veliaj veshi dje antiplumb në 40 gradë celcius?
Incidenti i djeshëm në mbledhjen e Këshillit Bashkiak të Tiranës rezulton të jetë një skenar i mirëorganizuar që ka synuar gjakderdhje live! Fotoja më poshtë tregon se Erion Veliaj në temperaturë 40 gradë ka shkuar i veshur me një xhup i cili poshtë tij fsheh antiplumbin e ngjeshur pas trupit! Pyetja është se për cfarë i duhet antiplumbi Erion Veliajt në godinën qe e kontrollon në cdo milimetër qofte me kamera e po ashtu edhe me sikaret e tij besnike! Këshilltari i opozitës Tedi Blushi foli sot për një skenar të mirëorganizuar i cili kishte si qëllim gjakderdhje brenda këshillit bashkiak te Tiranës! Dyshimet janë se përmes 4 personave të paautorizuar brenda Këshillit Bashkiak, Erion Veliaj ka tentuar të imitojë atentatin e Donald Trump, por në fund skenari ka dështuar! Për të shtuar dyshimet mjafton fakti që ditën e djeshme si asnjëherë tjetër detektori i armëve në hyrje të Bashkisë së Tiranës ishte hequr krejtësisht. Dyshimet shtohen edhe më shumë për inskenimin ndërsa Bashkia e Tiranës ka asgjesuar pamjet e kamerave të brendshme dhe ka dërguar në polici vetëm një porcion të videos ku Tedi Blushi godet Halit Valterin, kjo e markuar me logon e Report TV, megjithëse në sallën e këshillit nuk ka qenë prezente asnjë kamera!
p.s…lajmi i mirë i gjithë kësaj ngjarje, është që qartazi Erion Veliaj është në dëshpërim total!
