Më 17 shkurt, pas vizitës te kardiologia e kujdesshme e lagjes sime nr. 1, dr. Anila Shahini Rexha, mora një rekomandim për të vendosur holter ritmi.
Për moshën time (85) ky kontroll është gjithnjë i nevojshëm për t’u dalë përpara të papriturave. Me fletën e rekomandimit në dorë shkova te ambulanca e specialiteteve e quajtur Iraniane.
Infermierja tek e cila u paraqita, më vështroi me keqardhje të thellë dhe duke psherëtirë, më tha:
– A e di sa larg ka shkuar holteri?
– Pse, ku ka shkuar, – e pyeta duke kujtuar se nuk vendosej më në atë ambulancë, si më parë, po diku tjetër, larg.
– Jo, – më tha, këtu është, – por të takon për datën 6 NËNTOR!
– Do ta mbash?
– Po, – i thashë. Dhe infermierja e shënoi datën 6 nëntor 2023 në fletën time të rekomandimit, që kishte përpara. Megjithatë, zemërmirë dhe e dhembshur, siç duhet të jetë kushdo që punon në shëndetësi, m’u lut t’i jepja numrin e telefonit, se kushedi ….
Pra, qytetari i Tiranës duhet të presë gati tetë muaj që t’i vijë radha për të vendosur një holter!
Në këto raste, populli i thjeshtë, siç jemi dhe ne të gjithë pensionistët, pyet: A e di qeveria këtë gjë? (disa e shqiptojnë edhe qeverria!).
Prandaj po ia drejtoj këtë letër të hapur një anëtareje të qeverisë. Që unë dhe shokët e mi, atë shpërblim që na jep qeveria në fund të vitit si pensionistë, të mos e shpenzojmë për holterin te klinikat private!
Është qesharake që unë të shkoj te doktoresha ime e lagjes më 7 nëntor dhe t’i dorëzoj regjistrimet e holterit që më ka rekomanduar ajo më 17 shkurt, para tetë muajsh! Mendoj se edhe dy javë nga koha e rekomandimit të mjekut kardiolog janë tepër për të vendosur një holter.
Dua të shpresoj se kjo letër nuk do të bjerë në vesh të shurdhër.
Me nderim
Prof. Emil Lafe
—–
©Copyright Gazeta DITA
Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
