U gjenden në banesë 182 fidanë kanabis, pranga 49-vjeçares në Fier. Në kërkim bashkëshorti i saj, i arrestuar më parë për drogë. Portokalle Yzeriraj është arrestuar nga policia vendore dje, ndërsa Daniel (Sokol, Kristo) Yzeiraj, 51-vjeç, është shpallur në kërkim për kultivim kanabisi. Burime zyrtare thanë se në banesën e të dyshuarve, në fshatin Kreshpan, policia gjeti dhe asgjësoi 182 fidanë të dyshuar narkotikë kanabis sativa, të mbjellë në kubikë dhe gati për kultivim në parcelë.
Gjithashtu, në banesë u gjet dhe u sekuestrua një armë gjahu që mbahej pa leje. Policia thotë se po vijon puna për kapjen e Daniel Yzeirajt. Ky i fundit rezulton me precedent të mëparshëm kriminal, pasi në 2018 është arrestuar me drogë.
