Këtë të hënë u nënshkrua marrëveshja për zhvillimin e projektit “Durrës Yacht & Marina”.
“Projekti më i madh ekonomik në Republikën e Shqipërisë”. Kështu e ka konsideruar zv/kryeminisrja, njëherësh ministre e Infrastrukturës dhe Energjisë, Belinda Balluku marrëveshjen e firmosur sot mes Qeverisë Shqiptare, Albanian Seaports Development Agency, Eagle Hills Real Estate.
Mohamed Alabbar themeluesi dhe pronar i kompanisë EMAAR me qendër në Dubai tha se ky projekt është një nga projektet , i cili renditet tek më të përparuarit në botë.
“Jemi me kaq fat ku jemi sot, sepse ajo që kemi rritur është vetëm fillimi. Kemi punuar fort, duke besuar se do të ndodhte, por në të njëjtën kohë shohim entuziazmin e njerëzve për vizionin tuaj. Jemi shumë krenarë për këtë arritje.
Disa nga gjërat që ne po bëjmë aty nuk jam bërë askund në botë. Është një nga projektet më të përparuara në botë. Kemi një ekip të plotë shqiptar dhe ky ekip po shtohet.
Këta njerëz që punojmë me ne nga Shqipëria, po drejtojnë një nga projektet më të përparuara në botë. Disa nga gjerat që po bëjmë këtu janë më të përparuara se në Dubai”, tha ai.
Ai garantoi qytetarët shqiptarë se nuk do t’i zhgënjejë me këtë projekt, të cilin e cilësoi madhështor.
“Nuk do t’ju zhgënjej”, tha Alabbar.
Kryeministri Edi Rama, në fjalën e tij pas nënshkrimit të marrëveshjes për projektin tha:
“Durrës Yacht & Marina” hyn në ekonominë shqiptare si një lokomotivë që do të sjellë një impakt të jashtëzakonshëm në rritjen e shpejtësisë së zhvillimit ekonomik por dhe si një konkurrent në një treg më të gjerë se ai shqiptar, që do të ofrojë jo vetëm shërbime të një cilësie të padiskutueshme por punësim cilësor dhe shumë profile pune të mirë paguara për shumëkënd që nuk do të ketë më asnjë arsye nëse do realisht të punojë, që ta shohë të ardhmen jashtë vendit.
Durrës Marina do të sjellë mbrapa në vendin e tyre njerëz jo vetëm nga Durrësi por dhe nga vende të tjera për të punuar në Shqipëri.
Pikërisht për këtë ambicie Durrës Marina do të duhet të bëjë realitet të gjitha këto që sot ne i dimë nga konkluzionet logjike për investimin më të madh në historinë e vendit tonë dhe të rajonit. Deri dje shumëkush thoshte shikoni Maqedoninë, ku janë investimet.
Ky investim vjen jo nga qielli por si rezultat i një baze të re të një themeli të ri për Shqipërinë turistike. Një vend që krijon besim, dhe shfaq një potencial të jashtëzakonshëm.”
j.l./ dita
