Flakët që nisën mbrëmjen e djeshme në malin mbi fshatin Lukovë kanë përfshirë një sipërfaqe të gjerë pyjore, duke djegur pothuajse gjysmën e faqes së malit dhe duke u afruar deri pranë shtëpive të para të zonës së banuar.
Banorët, të alarmuar nga përhapja e shpejtë e zjarrit dhe tymi i dendur, janë detyruar të largohen nga banesat gjatë natës.
Zjarrfikësit vendas nuk kanë mundur ta frenojnë përhapjen e flakëve për shkak të terrenit të thyer dhe erës së fortë.
Ndërhyrja ka ardhur mëngjesin e sotëm, kur një helikopter i specializuar ka ndërhyrë për të shuar vatrat më të mëdha me ujë të marrë nga deti. Por ai është larguar për mungesë karburanti, ndërkohë siç shihet edhe në terren, vatra të izoluara vijojnë të digjen në shpatet e malit, duke mbajtur të tensionuar situatën.
View this post on Instagram
Banorët janë ende të shqetësuar për mundësinë e rindezjes, ndërsa ndihma nga forcat zjarrfikëse është ende e pamjaftueshme.
Zjarret në zonat malore të bregdetit jugor këtë verë kanë qenë të shpeshta. Autoritetet lokale bëjnë thirrje për kujdes maksimal dhe hetime për shkaqet e zjarrit, për të shmangur përsëritjen e situatave të tilla dramatike.
