Gjykata e Posaçme Kundër Korrupsionit dhe Krimit të Organizuar ka kaluar për gjykim dosjen në ngarkim të ish-kryebashkiakut të Lezhës, Fran Frrokaj, si dhe 10 zyrtarëve të tjerë të akuzuar për tjetërsimin e pronave në zonën e “Ranës së hedhun”. GJKKO ka pranuar gjithashtu gjykimin e shkurtuar. Sipas hetimeve të nisura që nga viti 2019, rezulton se janë përfituar në mënyrë të jashtëligjshme 66 mijë metra katrore tokë në bregdetin e Lezhës, me vlerë 13 milionë euro. SPAK argumenton se është dokumentuar se në kundërshtim me ligjin janë përvetësuar sipërfaqet e mëdha, ndërsa në vitin 2021 gjykata vendosi sekuestrimin e këtyre pronave, me një vlerë tregu prej 55 milionë euro.
Ish-kryebashkiaku i Lezhës, Fran Frrokaj, u dënua me vendim të formës së prerë me 3 vite burg për shpërdorim të detyrës dhe tjetërsim të pronave tek “Rana e Hedhun” në Shëngjin, një dosje tjetër kjo, e nisur prej vitit 2017. Fran Frrokaj është hetuar në gjendje të lirë dhe në shtator të vitit 2020, Shkalla e Parë e dënoi me 4 vite burg, por Apeli i Shkodrës vendosi t’ia ulë dënimin në 3 vite. 13 milionë euro pasuri të sekuestruar në korrik i përkasin grupit të Fran Frrokaj dhe 10 të tjerëve, për të cilët SPAK mbylli hetimet, ndërsa 42 milionë euro pasuri të sekuestruara në vitin 2017 i përkasin grupit të vëllait dhe motrës së ish-deputetit Arben Ndoka.
Në tetor 2022 SPAK përfundoi hetimet dhe çoi në gjyq 11 të pandehurit e fashikullit më të fundit të dosjes, për tjetërsimin e pronave në bregdetin e Shëngjinit. Gjatë hetimit të nisur prej vitit 2019 rezulton se është përfituar në mënyrë të paligjshme një sipërfaqe prej 66 000 m2 tokë në disa zona bregdetare në Lezhë, me një vlerë prej rreth 13 milion euro.
