Prokuroria e Posaçme ka dhënë pretencën për ish-kryebashkiakun e Lushnjes, Fatos Tushe, lidhur me akuzën e mosdeklarimit të pasurisë. SPAK kërkoi dënimin e Tushes me 1 vit e 5 muaj burg, por për shkak të gjykimit të shkurtuar, ai do të përfitojë një zbritje të dënimit me 1/3.
Vetëm pak muaj pasi shlyeu dënimin prej 3 vjet e 4 muaj burg për shpërdorim detyre dhe shkelje të barazisë në tendera, ndaj Fatos Tushes nisi një tjetër hetim që lidhet me pasurinë e tij. Bëhet fjalë për një apartament në bregdet, të cilin ai nuk e ka deklaruar.
Ish-kryebashkiaku socialist u dënua në korrik të 2022 me 2 vjet e 4 muaj burg për shpërdorim detyre nga Gjykata e Posaçme e Shkallës së Parë, ndërsa akuzat për shkelje të barazisë në tendera mbetën pa vendim, ndonëse SPAK kishte kërkuar një dënim prej 5 vjetësh.
Në mars të vitit të kaluar, Apeli i Posaçëm i shtoi dënimin Fatos Tushes me 1 vit, duke e rikthyer në burg për të përfunduar pjesën e mbetur të dënimit për veprën penale të shkeljes së barazisë në tendera.
Gjithashtu, prokurorja e SPAK, Manjola Kajana, ka kërkuar edhe konfiskimin e apartamentit të fshehur.
i.b./dita
