Nis faza e parë e konkurrimit për Patrullë të Përgjithshme në Kolegjin Profesional të Akademisë së Sigurisë.
Në garë për 300 vendet e lira janë 714 kandidatë, të cilët po i nënshtrohen provimit që po zhvillohet në Pallatin e Kongreseve. Ndërsa ka publikuar pamjet nga salla e provimeve, ministri i Brendshëm, Bledi Çuçi ka bërë me dije se këto vite në Policinë e Shtetit janë afruar rreth 3 mijë të rinj duke ulur ndjeshëm moshën mesatare të efektivëve.
“714 kandidatë po bëjnë testimin me shkrim për 300 vende vakante në Policinë e Shtetit. I gjithë procesi po monitorohet nga kamerat dhe korrigjimi i testit do të bëhet me #Scandron, në prezencë të vetë aplikantëve, për të garantuar transparencë maksimale.
Me rreth 3 mijë të rinj që kemi afruar këto vite në policinë e shtetit kemi ulur ndjeshëm moshën e efektivëve. Do ta ruajmë këtë trend dhe do të ecim me shpejtësi në këtë korsi për të arritur te mesatarja e vendeve të BE-së, si dhe do të vijojmë rrugën e pakthyeshme për të modernizuar më tej Policinë e Shtetit përmes investimeve në teknologji. Kapacitetet dhe profesionalizmi i punonjësve të Policisë do të barazohet me atë të partnerëve tanë europianë”, shkruan ministri Çuçi në mesazhin e hedhur në rrjetin social facebook.
p.k\dita
