Incidente të dhunshme shpërthyen në kryeqytetin meksikan të shtunën gjatë një demonstrate kundër krimit dhe politikave të sigurisë qeveritare, duke plagosur rreth 100 oficerë policie dhe 20 protestues. Demonstratat u organizuan në qytete të ndryshme në të gjithë vendin nga “Lëvizja Sombrero”, e themeluar nga kryebashkiaku i Uruapan, Carlos Manzo, i cili ishte i famshëm për luftën e tij kundër krimit të organizuar dhe nga organizatat rinore.
Ndërsa protestuesit mbërritën jashtë pallatit presidencial, disa burra të maskuar rrëzuan barrierat metalike që policia kishte ngritur rreth tij dhe sulmuan oficerët me gurë. Forcat e sigurisë përdorën gaz lotsjellës për të shpërndarë turmën.
Mediat e huaja shkruajnë se autoritetet urdhëruan një hetim mbi një ankesë për brutalitet policor kundër një gazetari të gazetës La Jornada. Shumë protestues mbanin sombrero që të kujtonin ato që mbante Carlos Manzo, kryetari i bashkisë së Uruapan në shtetin perëndimor të Michoacan, i cili u vra më 1 nëntor.
Manzo ishte bërë i njohur për fushatën e tij për të goditur krimin. Banderola që shkruanin “Ne të gjithë jemi Carlos Manzo” u shfaqën pranë flamurit ikonik të piratëve nga seriali japonez “One Piece”, i cili është bërë simbol i protestave të të rinjve në të gjithë botën – nga Madagaskari në Filipine dhe Peru.
“Kjo është një nga qeveritë më të korruptuara që kemi pasur ndonjëherë”, tha Valentina Ramirez për AFP-në. “Është një qeveri e korruptuar droge që dëshiron të mbrojë të korruptuarit dhe kartelet në vend të popullit”, tha studenti që mori pjesë në demonstratë.
Presidentja meksikane Claudia Sheinbaum kritikoi thirrjet për pjesëmarrje masive në demonstrata, duke pretenduar se ato u financuan nga qendra të huaja kundër qeverisë. Presidentja Sheinbaum, e cila ka qenë në pushtet që nga 1 tetori 2024, ka ruajtur vlerësime të larta miratimi në vitin e saj të parë në detyrë, por politika e saj e sigurisë është kritikuar rëndë për shkak të vrasjeve të zyrtarëve, veçanërisht në shtetin e Michoacan.
j.l./ dita
