Ndihmësi i një deputeti të Parlamentit Evropian të partisë ‘Alternativa për Gjermaninë’ (AfD), një forcë e së të djathtës ekstreme u arrestua në Gjermani me dyshimin për spiunazh me pasoja të mëdha për llogari të Kinës.
Prokurorët, në një deklaratë të publikuar të martën, thanë se Jian G. akuzohet për dërgimin e informacionit në lidhje me diskutimet në organin ligjvënës të BE-së, tek inteligjenca kineze.
Në faqen e internetit e deputetit Maximilian Krah, kandidatit kryesor i AfD-së në zgjedhjet e qershorit për Parlamentin Evropian, shkruahet se Jian Guo është një nga ndihmësit e tij. Deputeti Krah tha se kishte mësuar për arrestimin e tij nga media dhe do të ndalonte së punuari me të, nëse akuzat vërtetoheshin.
Ankthi lidhur me dyshimet për spiunim nga Kina është rritur në të gjithë Evropën Perëndimore muajt e fundit.
Tre shtetas gjermanë u arrestuan të hënën nën dyshimet për spiunazh në lidhje me teknologjinë që shfrytëzohet për qëllime ushtarake.
Në të njëjtën ditë, dy persona u akuzuan në Britani për spiunazh për Kinën, mes tyre një person se kishte punuar për një ligjvënës të njohur në Partinë Konservatore në pushtet.
Më 25 mars, Shtetet e Bashkuara dhe Britania e akuzuan Pekinin për spiunazh kibernetik kundër miliona njerëzve, përfshirë ligjvënës, akademikë dhe gazetarë, si dhe kompani duke përfshirë ato që kanë të bëjnë me industrinë e mbrojtjes.
Këshilltari, i cili jetonte në Bruksel dhe në qytetin gjerman të Dresdenit, spiunoi gjithashtu figurat e opozitës kineze në Gjermani, thanë prokurorët. Ai u arrestua në Dresden të hënën dhe banesat e tij u bastis.
“Ai akuzohet për një rast veçanërisht të rëndë se ka punuar për një shërbim sekret të huaj”, thuhet në deklaratë.
Para dy javësh, gazeta çeke ‘Denik Na’ dhe revista gjermane ‘Der Spiegel’ raportuan se një tjetër kandidat i AfD-së për zgjedhjet e Parlamentit Evropian, ligjvënësi gjerman Petr Bystron, kishte marrë para nga një faqe mediatike pro-ruse. AfD tha se zoti Bystron e mohoi akuzën.
Konstantin von Notz, i cili kryeson komisionin parlamentar që mbikëqyr shërbimet e inteligjencës gjermane, tha se këto nuk ishin raste individuale, por tha se ka një problem më të gjerë brenda partisë AfD.
“AfD është një parti diktaturash”, tha ai. “Ata nuk përpiqen të fshehin përbuzjen e tyre për demokracinë tonë dhe sundimin e ligjit. Kjo i bën politikanët e tyre të ndikohen lehtësisht nga Kina dhe Rusia.”
Një zëdhënës i AfD-së tha se arrestimi i së hënës ishte “shumë shqetësues” dhe u zotua se partia do të mbështeste hetimin.
RRITEN KËRCËNIMET KINEZE DHE RUSE
Ministrja e Brendshme gjermane Nancy Faeser tha se nëse akuzat vërtetoheshin, kjo do të trajtohet si “një sulm ndaj demokracisë evropiane nga brenda”, duke vënë në dukje se shërbimet gjermane të sigurisë kishin përforcuar përpjekjet kundër-spiunazhit për shkak të kërcënimeve hibride ruse dhe përgjimeve kineze.
Një vit më parë, deputeti i AfD-së Krah kishte hedhur poshtë akuzat se këshilltari i tij po lobonte për Kinën si shpifje kundër tij.
“Bëhet fjalë për një punonjës të lindur në Kinë”, shkroi ai në platformën e mediave sociale X. “Ai është shtetas gjerman, anëtar i AfD-së, ka studiuar në Dresden dhe flet rrjedhshëm gjermanisht dhe anglisht. Po përhapen shumë gënjeshtra.”
Ambasada kineze nuk iu përgjigj menjëherë të martën kërkesave për koment.
Zëdhënësi i Ministrisë së Jashtme Wang Wenbin tha në një konferencë se raportet për spiunazhin kinez në Evropë ishin të ekzagjeruara dhe ato bëhen me “qëllim për të diskredituar dhe shtypur Kinën”.
Kancelari gjerman Olaf Scholz vizitoi Kinën javën e kaluar për të përmirësuar marrëdhëniet ekonomike me partnerin më të madh tregtar të Gjermanisë dhe për të diskutuar lidhur me mbështetjen e Kinës për Rusinë.
b.m/dita
