Gjermania ka vendosur rregulla të reja që kërkojnë nga burrat e moshës 17 deri në 45 vjeç të marrin autorizim zyrtar përpara se të largohen nga vendi për periudha më shumë se tre muaj.
Sipas raportimit të Berliner Zeitung, rregulli ka hyrë në fuqi më 1 janar 2026 dhe zbatohet për të gjithë ata që planifikojnë të qëndrojnë jashtë vendit për më shumë se tre muaj, për arsye studimi, pune apo udhëtimi afatgjatë.
Personat e prekur duhet të sigurojnë leje nga një qendër karriere e Bundeswehr-it përpara largimit.
Ky detyrim është tashmë pjesë e përhershme e ligjit gjerman, i miratuar përmes Aktit të Modernizimit të Shërbimit Ushtarak, dhe është zbatuar pa shumë vëmendje publike.
Më parë, leje të tilla kërkoheshin vetëm në raste kërcënimi të lartë ose në gjendje mbrojtjeje, si në rast të një sulmi të drejtpërdrejtë ndaj territorit federal. Me ndryshimet e reja, rregulli zbatohet edhe në kohë paqeje.
Një zëdhënës i Ministrisë Federale të Mbrojtjes në Gjermania konfirmoi masën, duke theksuar se qëllimi është të sigurohet një regjistrim i besueshëm i personave që mund të jenë subjekt i shërbimit ushtarak në rast nevoje.
Kjo masë është pjesë e një përpjekjeje më të gjerë për të rritur kapacitetet e ushtrisë gjermane, me synimin për të shtuar numrin e trupave nga rreth 184 mijë aktualisht në 255 mijë deri në 270 mijë ushtarë deri në vitin 2035.
Në kuadër të kësaj nisme, të gjithë të rinjtë meshkuj të lindur në vitin 2008 ose më vonë duhet të plotësojnë një pyetësor mbi gatishmërinë për shërbim ushtarak. Për gratë, ky proces mbetet vullnetar.
j.l./ dita
