Gjykata Kushtetuese ka rrëzuar kërkesën e deputetëve të Partisë Demokratike, që kundërshtonin zgjedhjen e Avokatit të Popullit.
Në vendimin e sotëm të Gjykatës Kushtetuese thuhet se disa prej pretendimeve të ngritura nga 44 deputetët demokratë, mes tyre çështja e nënshkrimeve të 28 deputetëve, rregulli “një deputet mbështet vetëm një kandidat”, interpretimi i nenit 72 të Rregullores së Kuvendit dhe pretendimi për një marrëveshje politike mes shumicës dhe pakicës, nuk ngrenë çështje të nivelit kushtetues.
Deputetët kërkonin verifikimin e zgjedhshmërisë dhe papajtueshmërisë së Avokatit të Popullit me funksionin, si dhe verifikimin e procedurës së zgjedhjes së tij dhe shfuqizimin e vendimit të Kuvendit të 11 dhjetorit 2025.
Sa i përket kritereve të zgjedhjes, Gjykata vlerësoi se Kuvendi ka diskrecion në vlerësimin profesional të kandidatëve për funksione kushtetuese, për sa kohë respektohen garancitë themelore procedurale dhe nuk ka arbitraritet. Në rastin konkret, ajo nuk konstatoi cenim të këtyre garancive.
Gjykata rrëzoi gjithashtu pretendimin për papajtueshmërinë për shkak të veprimtarisë politike të kandidatit, duke e cilësuar këtë pretendim të pabazuar.
Po ashtu, u rrëzua pretendimi se zgjedhja ishte e pavlefshme për shkak të mungesës së mbështetjes së deputetëve në momentin e votimit. Sipas Gjykatës, kushti i mbështetjes nga 28 deputetë ishte plotësuar në fazën e verifikimit të kandidaturave nga Komisioni i Ligjeve dhe tërheqja e mbështetjes pas kalimit të kësaj faze nuk prodhonte më pasoja në procedurën parlamentare.
Kështu Gjykata Kushtetuese vendosi njëzëri rrëzimin e kërkesës, ndërsa vendimi i arsyetuar do të publikohet brenda afateve ligjore.
j.l./ dita
