Kryeministri i Izraelit, Benjamin Netanyahu, ka paraqitur zyrtarisht një kërkesë për falje në procesin e tij të gjatë për korrupsion, duke e argumentuar si një veprim të domosdoshëm “në interesin publik”.
Letra drejtuar presidentit Isaac Herzog u depozitua të enjten dhe u bë publike të dielën. Në të, Netanyahu thotë se gjyqi i tij është shndërruar në “qendër të një polemike të ashpër” dhe se mban “përgjegjësi të gjerë publike”, për shkak të ndikimit të çështjes në vend.
Ai thekson se personalisht është i interesuar të provojë pafajësinë në gjykatë, por sipas tij “interesi publik kërkon të veprohet ndryshe”. Kërkesa nuk përmban asnjë pranim faji dhe as ndonjë angazhim për të ardhmen e tij politike, ndërkohë që Netanyahu ka mohuar në mënyrë të përsëritur akuzat për ryshfet, mashtrim dhe shkelje të besimit publik.
Zyra e presidentit Herzog konfirmoi marrjen e kërkesës, duke deklaruar se ai “do ta shqyrtojë me kujdes dhe përgjegjësi të plotë”, pasi vetëm kreu i shtetit ka të drejtë të japë falje.
Kërkesa për falje përbën një kthesë të fortë për Netanyahu-n, i cili më herët kishte deklaruar se akuzat do të rrëzoheshin dhe se ai do të provonte pafajësinë në gjykatë.
Në letër, ai shkruan se Izraeli po përballet me “sfida të mëdha të sigurisë dhe mundësi diplomatike”, duke shtuar se synon “të shërojë përçarjet, të arrijë unitet kombëtar dhe të rikthejë besimin e publikut në institucionet e shtetit”.
Ndërkohë, disa javë më parë, ish-presidenti amerikan Donald Trump ka kërkuar gjithashtu faljen e Netanyahu-t, duke e quajtur atë “një kryeministër të vendosur në kohë lufte” dhe duke e vlerësuar për rolin e tij në drejtimin e Izraelit.
j.l./ dita
