Drejtuesja e misionit të vëzhguesve të OSBE-ODIHR, Audrey Glover, ka deklaruar se deri më tani procesi zgjedhor i 14 majit paraqitet i qetë.
Glover thekson se duhet pritur me durim deri në përfundim të zgjedhjeve për të dalë në një përfundim të qartë lidhur me mbarëvajtjen e tyre.
“Ne duhet të shohim të gjithë procesin sot dhe të shohim se çfarë mund të nënvizojmë dhe të bëjmë vlerësimin përkatës”.
Ajo njoftoi se ekipi po e vëzhgon nga afër procesin dhe shumë pyetje duhet të gjejnë përgjigje, por se ende nuk ka një panoramë të qartë.
“Edhe procedurat e djeshme, shpërndarja e materialeve zgjedhore, janë pjesë e raportit tonë që do të prezantohet të hënën”.
Sipas saj, zgjedhjet nuk mund të krahasohen asnjëherë pasi janë unike në llojin e tyre.
Si shembull ajo solli zgjedhjet e fundit lokale, për të cilat tha se ishin të njëanshme.
“Ne nuk krahasojmë kurrë zgjedhjet sepse çdo zgjedhje është unike, për shembull zgjedhjet e fundit lokale ishin të njëanshme. Ne duhet të presim si do të shkojë kjo në praktikë”.
j.l./ dita