Qendra Spitalore Universitare “Nënë Tereza” ka reaguar lidhur me ngjarjen e ndodhur ditën e mërkurë në spitalin infektiv, ku 5 persona dhunuan një mjeke të këtij spitali.
Përmes një postimi në facebook, QSUT dënon dhunën e ushtruar dhe thekson se shërbimi spitalor është në gadishmëri për t’iu përgjigjur në kohë të gjithë pacientëve që kanë nevojë.
“Shërbimi Infektiv në QSU “Nënë Tereza” është një ndër shërbimet pararojë që punon me përkushtim ndaj çdo pacienti.
Nisur nga rasti i dhunshëm ndodhur së fundmi ndaj koleges tonë, ne dënojmë dhunën ndaj bluzave të bardha dhe kërkojmë mbështetjen në punën tonë të çdo pacienti dhe familjari, në mënyrë që shërbimi të vijojë normalisht dhe në cilësinë e duhur.
Qendra Spitalore Universitare “Nënë Tereza” do të vijojë të mbështesë maksimalisht stafet mjekësore në punën e tyre të palodhur duke garantuar sigurinë në vendin e tyre të punës dhe mbrojtjen e dinjitetit profesional të mjekut në shoqëri”, thuhet në reagimi e QSUT-së.
Shkak i goditjes së mjekes nga dy të arrestuarit Igli Spahia dhe Bledar Bali, u bë vdekja e vëllait të njërit prej tyre. Të ndaluarit akuzonin mjeken në fjalë për neglizhencë në shërbim.
o.j/dita
