Lukova është një nga perlat e bregut të Jonit. Fshati dallon nga fshatrat e tjerë piktoreskë të Rivierës shqiptare nga gjelbërimi i pafund dhe pamja e pazakontë panoramike mbi det.
Lukova ka marrë një identitet të veçantë në turizmin shqiptar, identitet i cili po theksohet vitet e fundit. Turistët që mbushin fshatin muajt e verës, janë natyralistë. Kamperat dhe çadrat përhapen nëpër ullinjtë e shumtë që bashkohen në harmoni të plotë me ngjyrën e kaltër të detit Jon.
Por ky fshat i veçantë ku klima bregdetare gërshetohet mrekullisht me klimën malore, sezonin e fundit turistik ka arritur të përmirësojë dukshëm një nga mungesat e vëna re vitet e mëparshme: Ushqimi i mirë dhe cilësor.
Ndryshe nga Saranda apo fshatrat e Himarës, ku dyndja turistike ka nisur të ndikojë në cilësinë dhe freskinë e ushqimit, Lukova ka arritur këtë vit një nivel befasues të kuzhinës turistike.
Sugjerohen dy pika ku mund të konsumohet ushqim i cilësisë së lartë: Një prej tyre është restorant Perla në hyrje të fshatit, ku supa, sallata dhe gatimet e peshkut nga zonja e shtëpisë janë të mrekullueshme.
Për të dashuruarit pas brumit dhe picës, Lukova ofron një nga piceritë më surprizuese të Rivierës shqiptare. Piceri Lukova një ballkon mbi det, në një kënd të vogël të rrugës kryesore që shkon përmes fshatit, do t’ju befasojë.
Kjo piceri e vogël, në mbrëmje është e mbushur me turistë të huaj, kryesisht gjermanë e zviceranë, edhe pse është ende fillim qershori.
DITA ua sugjeron Lukovën fuqimisht, jo vetëm si një destinacion ende të lirë krahasuar me Dhërmiun, Jalën apo Sarandën, por edhe unik dhe të papërsëritshëm, për detin dhe pamjen mbi det që të le pa frymë.
Aktualisht Ministria e Turizmit dhe Qendra për Angazhim, Hulumtim dhe Transformime janë duke përgatitur një album të plotë mbi disa nga hotelet dhe gjiret detare të Lukovës.
—
Dita
Për më shumë këshilla mbi udhëtime në rivierën shqiptare, vizitoni www.gazetadita.al
