Një incident ka ndodhur në Kolegjin Zgjedhor, ku po mbahet seanca për rinumërimin e 18 kutive të Kuçovës.
Lefter Maliqi ka ofenduar përfaqësuesin e KQZ-së, Ylli Merkajn, duke i thënë “rrugaç, hajdut”.
“Ti je hajdut, kë provokon ti, hajdutër. Mua më mëson ti, që kam qenë oficer policie 25-vjeç, 7 vite anëtar i Komisionit të Sigurisë, unë jam për të mbrojtur demokracinë këtu”, tha ai.
Kolegji Zgjedhor mori në shqyrtim ankimimin e koalicionit “Bashkë Fitojmë” dhe kandidatit të saj Lefter Maliqi për rezultatin e zgjedhjeve në bashkinë e Kuçovës.
Maliqi dhe përfaqësuesit ligjor të koalicionit opozitar “Bashkë Fitojmë” kërkuan nga trupa e Kolegjit që të shpallë pavlefshmëri për zgjedhjet e 14 majit.
Pas daljes nga salla ku po kryhet numërimi, Maliqi tha për mediat se nuk kanë informacion sesa fletë votimi janë, si dhe shtoi se brenda sallës ngriti zërin pasi pa parregullsi. Ai pranoi se filmoi me telefon, por tha se i duhej për provë.
“Është krim shtetëror, elektoral. Se ca ka në këto 18 kuti nuk e di, sot filloi seanca. Ata marrin dokumentacionin por e kanë bosh për këto 18 kuti. Sekretari ka pasur probleme me avokatët e mi.
Ne nuk e dimë sesa fletë votimi janë. Unë tregoj muskujt e trurit dhe kundër krimit që është bërë. Unë kam qenë gjithmonë i pastër, nuk kam pasur asnjë biznes. Një gjë ta dini Kuçova është e majtë, unë kam mbështetje të majtë dhe të djathtë. Unë e ngrita zërin, unë filmova që nesër ta kisha si provë. Këtu kanë ardhur vëzhgues të tjerë, ai nuk është vëzhgues”, tha Maliqi.
Në garë për Bashkinë e Kuçovës ishte Kreshnik Hajdari i Partisë Socialiste, Lefter Maliqi i Koalicionit “Bashkë Fitojmë” dhe Ilirjan Koxhaj i Partisë Demokratike.
Zgjedhjet u fituan nga kandidati Kreshnik Hajdari i PS-së.
j.l./ dita
