Duke nisur nga dita e sotme ka nisur funksionimi i hartës së re gjyqësore. Kryetarja e KLGJ-së, Naureda Llagami në një konferencë për mediat sqaroi të gjithë procedurën si do të punohet me hartën e re, ndërsa u shpreh se janë marrë të gjitha masat që gjithçka të shkojë siç duhet.
Në fjalën e saj ajo deklaroi se KLGJ po punon për idenë e një Gjykate të re të Apelit të Përgjithshëm, ndërsa përmendi edhe ato që ajo i quajti “pengesa për qytetarët”.
Sipas Llagamit, sot qytetarët do të marrin një shërbim më të mirë, duke theksuar se në godinat ekzistuese të Apeleve në rrethen do vazhdojë të ketë shërbime.
“Kemi marrë masat qe kjo te funksionoje. Jane 1868 çeshtje qe vazhdojne proceset gjyqesore. Janë 27 mijë çështje që janë bashkuar dhe për shkak të zhvillimeve të teknologjisë këto janë gati për t’u rishortuar ne trupen gjyqesore prej 25 veta.
Po të bëjmë një kalkulim të thjeshtë i bie që çdo gjyqtar do ketë 1080 çështje dhe po të bëj krahasimin me të dhënat që kam në KLGJ çdo gjyqtar këtu ka më pak çështje sesa ka Gjykata e Shkallës së parë që ka shkuar në 1500 çështje.
Janë marrë masa për një staf administrativ cilësor. Një gjyqtar ka 5.5 staf administrativ që asiston. Gjyqtarët janë akomoduar në salla. Kemi të gjithë zyrat dhe KLGJ po punon për idenë e një Gjykate të re të Apelit të Përgjithshëm.
Kemi gjetur mbështetjen e qeverisë që këtë gjykatë ta kemi shumë shpejt, a do jemi këtu ku kemi apo diku tjetër nuk ka rëndësi, për ne ka rëndësi, që të kemi një njësi shërbimi.
Meraku tjetër që kemi është çfarë do ndodhë me qytetarët? Kaq informacion e keni marrë në faqen zyrtare të KLGJ, që nuk do ketë asnjë pengesë. E vetmja pengesë që dot ketë qytetari është që nuk do ta ketë të aksesueshme gjyqtarin. Këtu po, do kemi një pengesë, por për pengesë tjetër jo. Sepse qytetari do të marrë shërbimin aty ku e ka marrë gjithmonë. Pra në godinën e gjykatave të mëparshme të Apeleve. Aty do marrë një shërbim që ka të bëjë jo vetëm me informacionet, por edhe kërkesat dhe aktet që duhen për një gjykim. Do marrë informacion për dosjen e tij.
Meraku tjetër që mund të kemi për qytetarin është a do ta marrim shërbimin kualitativ. Sa më shumë të specializuar gjyqtaret aq më cilësor do jetë shërbimi. Sot nuk do të dështojë asnjë seanca, sot ai do shërbehet më mirë”, tha Llagami.
j.l./ dita
