Dosja “Balluku” duket se është shumë më e madhe nga çfarë është parë deri tani. Ajo që fillimisht u paraqit si një hetim për tunelin e Llogarasë dhe Lotin 4 të Unazës së Madhe, ka marrë përmasa të reja dhe nën verifikim janë të 7 lotet e projektit por edhe procedura të tjera tenderuese.
Bëhet fjalë për një nga investimet më të mëdha publike në vend, 28.7 kilometra rrugë me një vlerë rreth 450 milionë euro. Mësohet se SPAK ka në duar një sasi të madhe dokumentesh, komunikimesh dhe korrespondencash zyrtare që i përkasin viteve 2021–2023. Të gjitha këto janë pjesë e asaj që brenda institucioneve quhet “dosja e madhe” e tenderëve të infrastrukturës.
Sipas dokumentacionit në vitin 2021, menjëherë pas zgjedhjeve parlamentare, për Unazën u hapën 7 tendera njëherësh të Unazes së Madhe. Mesazhet e përfshira në dosjen hetimore tregojnë se më 12 gusht 2021, punonjësit e ARRSH-së punonin deri pas mesnate për publikimin e tenderëve.
Sipas prokurorisë, gjithë ky nxitim kishte vetëm një qëllim, formalitetet e procedurës të mbylleshin në kohë. Sepse, siç del nga hetimet, fituesit ishin përcaktuar paraprakisht.
Mesazhet mes ministres Belinda Balluku dhe Berberit tregojnë se vetëm katër ditë para hapjes së ofertave, ministrja udhëzonte se kush duhej të merrte pjesë në garë dhe cilat kompani duhej të tërhiqeshin.
Mësohet se në tavolinën e hetuesve te SPAK ndodhen edhe procedura të tjera të mëdha infrastrukturore, të cilat po kalojnë në filter, si dokumentet, komunikimet dhe mënyra se si janë marrë vendimet.
Në janar 2024 u arrestua ish-drejtori i ARRSH-së, Evis Berberi. Ai moment u pa si lëvizja e parë e dukshme e organit të hetimit, por nuk ishte lëvizja e fundit. Pasi SPAK nisi të shkundë dokumentet, hetimi tashmë është zgjeruar nga Llogaraja tek lotet e Unazës së Madhe dhe jo vetëm aty.
