Detaje të reja për vrasjen e 19-vjeçarit Stiven Toshkësi në Tiranë.
Në pranga kanë përfunduar dy 18-vjeçarët Ensi Maze dhe Axel Hoxhaj. Deri më tani është raportuar se e gjithë ngjarja ka ndodhur sepse Axel Hoxhaj i kishte ngacmuar të dashurën Toshkësit.
Por dëshmia e vajzës në Prokurori, e ka përmbysur situatën. Detaje nga ljo dëshmi kanë rrjedhur sot në media. Konflikti i viktimës për vajzën, ka qenë me një person tjetër dhe jo me dy 18-vjeçarët e arrestuar.
Këta nuk kanë lidhje me vajzën, por kanë shkuar “të sqarohen” sepse këtë ua ka kërkuar shoku i tyre, i cili kishte patur më herët lidhje me të dashurën e viktimës.
Mësohet se Toshkësi konfliktin për vajzën e ka pasur me shtetasin Arbër Murataj 18-vjeç. Ky është djali i famëkeqit Admir Murataj, i cili mbeti i vrarë në grabitjen e Rinasit në prill të vitit 2019.
Sipas burimeve policore dhe nga grupi hetimor, Arbër Murataj rreth dy muaj më parë ka marrë në telefon Toshkesin, pasi kishin patur fërkime xhelozie lidhur me vajzën në fjalë.
Këta të dy janë takuar në rrugën e Elbasanit, pranë shkollës së Baletit. Përflitet se aty ka patur grindje dhe Murataj ka goditur viktimën me një hanxhar. Toshkësi është plagosur lehtë në bark dhe është larguar nga vendi i ngjarjes, por nuk ka bërë denoncim në polici.
Dy muaj më vonë, më 18 prill ai u godit për vdekje me thikë nga Axel Hoxhaj, i cili rezulton të ketë lidhje të afërt familjare me Arbër Muratajn.
Për dy 18-vjeçarët gjykata dha masën arrest në burg, gjithashtu ka marrë në pyetje edhe vajzën, ku ka treguar edhe arsyet e konfliktit, por ende Prokuroria nuk ka arritur në një përfundim.
Kush është Admir Murataj, “koka” dhe viktima e grabitjes së Rinasit
Grabitja spektakolare ndodhi në vitin 2019. Një makinë pa targa mbi të cilën shkruhej “Hetimi Tatimor” vodhi shumën e parave që do të transportohej në më pak se 2 minuta. Pasi kryen grabitjen, 4 autorët u larguan me shpejtësi nga dera e pasme e aeroportit.
Gjatë largimit ka pasur edhe një shkëmbim zjarri mes autorëve dhe policisë, ku ka mbetur i vrarë Admir Murataj, i cili njihet si ‘truri’ i grabitjeve.
Gjatë grabitjes, Murataj mbante veshur një maskë. Para se të vritej, Admir Murataj ishte në kërkim prej më shumë se dy vitesh si organizator edhe i tre grabitjeve të tjera të blindave me para të bankave në Rinas, dy në 2015 dhe një në 2017.
Murataj ishte arratisur nga burgjet greke dhe përdorte 15 emra.
j.l./ dita
