Një tjetër skandal ka përfshirë Komitetin Ekzekutiv të Federatës Shqiptare të Futbollit, të cilët po vërtetojnë dita ditës inkrimimin e institucionit të futbollit shqiptar. Gazeta ‘TemA’ raporton se sipas informacioneve, anëtari i Komitetit Ekzekutiv të UEFA-s, Abdyl Kuriu, është nën akuzë për falsifikime notash gjatë përiudhës kur jepte mësim në Insitutin e Fiskulturës.
Mësohet se Kuriu u ka vendosur rreth 110 studentëve notën 10-të, ndërkohë që shumica prej tyre nuk paraqiteshin fare në mësim si dhe disa të tjerë nuk ishin prezent në Shqipëri. Për këtë skandal Instituti i Fiskulturës ka përjashtuar nga institucioni Abdyl Kuriun, i cili po përballet në Gjykatë me akuzat e falsifikimeve. Një ngjarje që është mbajtur e fshehtë nga Federata Shqiptare e Futbollit me urdhër të Armando Dukës, të cilit njerëzit që ka zgjedhur si antar të Komitetit Ekzekutiv për t’i shërbyer po i bien një e nga një. Pas Kuriut që ndodhet nën akuzë për falsifikim, pak muaj më parë një tjetër antar i Komitetit Ekzekutiv të FSHF-së, Arben Dervishaj, i cili mbante edhe postin e zv.presidentit u arrestuar për aferën e inceneratorëve.
