Drejtori i Përgjithshëm i Policisë së Shtetit, Skënder Hita, deklaroi të dielën në mbrëmje se dhjetë efektivë policie mbetën të plagosur gjatë sulmit ndaj Komisariatit nr. 3 në Tiranë, ndërsa protestat kundër qeverisë së kryeministrit Edi Rama u shoqëruan për të gjashtën ditë radhazi me përplasje të dhunshme.
Sipas Hitës, grupe personash të maskuar sulmuan godinën e komisariatit me bomba molotov, mjete piroteknike dhe gurë, duke rrezikuar punonjësit e policisë dhe personat që ndodheshin brenda ambienteve të paraburgimit.
“Si pasojë e këtij sulmi, mbetën të plagosur 10 punonjës të Policisë, të cilët ndodheshin në krye të detyrës, në shërbim të ruajtjes dhe sigurisë së Komisariatit”, deklaroi Hita.
Ai theksoi se efektivët e lënduar nuk kishin marrë pjesë në operacionet policore gjatë protestave të ditëve të mëparshme.
“Sulmi ndaj një komisariati policie nuk është protestë”, tha drejtori i Policisë, duke e cilësuar përdorimin e bombave molotov ndaj efektivëve si dhunë të rëndë që nuk mund të justifikohet.
Sulmi ndaj komisariatit ndodhi rreth orës 18:00, kur disa ambiente të godinës u përfshinë nga flakët. Forcat zjarrfikëse ndërhynë për shuarjen e zjarrit, ndërsa përplasjet mes demonstruesve dhe policisë vijuan në rrugët e kryeqytetit.
Hita deklaroi se gjatë protestës së të dielës u plagosën edhe punonjës të tjerë policie, si pasojë e hedhjes së gurëve, sferave metalike dhe mjeteve piroteknike, por nuk dha një bilanc të përgjithshëm të të lënduarve.
Sipas tij, policia po punon për identifikimin e personave të përfshirë në sulme dhe dokumentimin e veprimeve të tyre për referim në organet e drejtësisë.
Megjithatë, drejtori i Policisë pranoi detyrimin e forcave të rendit për të respektuar të drejtat e qytetarëve dhe parimin e proporcionalitetit gjatë ndërhyrjeve.
“Vendosmëria për të ndaluar dhunën duhet të shoqërohet në çdo rast me respektimin e ligjit dhe të drejtave të qytetarëve”, deklaroi Hita.
Ai u bëri thirrje protestuesve paqësorë të distancohen nga personat që përdorin dhunë, ndërsa këmbënguli se policia nuk duhet të shihet si kundërshtare e qytetarëve.
