Nga Migena Aleksi
Për dekada me radhë, revista “Hosteni” ka qenë një pasqyrë ku shoqëria shqiptare ka parë të vërtetat e saj më të zhveshura. Ato që nuk thuheshin dot në tribunat zyrtare, thumbi i mjeshtrave të penës i bënte të mundura dhe të kuptueshme. Për ne që u rritëm mes dy epokave, ka qenë padyshim një institucion i veçantë i mendimit kritik. Këtë kritikë ia përcillte publikut ndryshe nga gjithë të tjerët, nëpërmjet humorit fin dhe satirës pa dorashka.
Në krye të kësaj shkolle të veçantë publicistike ka qëndruar përherë figura e Filip Çakulit, shkrimtarit dhe gazetarit ikonik që na ka mësuar prej asaj kohe e në vijim, guximin për ta thënë të vërtetën edhe me buzëqeshje. Dhe çfarë të vërtetash!
Nga faqet e “Hostenit” klasik te gazetaria investigative e ditëve tona, Çakuli e krijoi dhe e përfaqëson këtë standard me mprehtësinë e tij karakteristike, stilin e paimitueshëm, por veçanërisht me aftësinë për ta lexuar njëherazi psikologjinë e pushtetit dhe atë të njeriut të thjeshtë.
Ndaj rigjallërimi i këtij brandi historik përmes platformës Hosteni.com është një sipërmarrje me vlerë të jashtëzakonshme kulturore e mediatike që rikthen në vëmendje jo vetëm një arkiv të pasur humori e analize, por edhe një model që i mungon medias së sotme digjitale.
Më poshtë po botojmë një material të marrë nga Hosteni.com, si një ftesë për të shijuar edhe një herë atë stil unik që mban vulën e papërsëritshme të Filip Çakulit dhe shkollës së tij të satirës:
Shkarkimi i zinxhirit komandues…
“….U shkarkua zinxhiri komandues i Policisë së Sarandës pas një vrasjeje.
Komisarët ikën. Përgjegjësit u shkarkuan. Zinxhiri komandues u këput.
Por jo tamam.
Shefi i Komisariatit të Sarandës, në vend që të mbetet pa detyrë, u çua shef komisariati në Dibër.
Pra, shkarkimi funksionon kështu:
— Ke dështuar në Sarandë?
— Shko drejto Dibër!
— Ke humbur kontrollin e situatës?
— Merr një komisariat tjetër!
— Të hoqën nga posti?
— Po, por vetëm nga ai post.
Ky nuk është shkarkim. Është transferim me dekoratë.
Në administratën shqiptare, përgjegjësia nuk të heq nga puna. Të heq vetëm nga adresa: Sot shef në Sarandë. Nesër shef në Dibër. Nëse vazhdon kështu, pasnesër mund të jetë drejtor në Tiranë.
Dhe kështu zinxhiri komandues nuk këputet fare. Vetëm zgjatet…
Marrë nga Hosteni.com
