Kandidati i koalicionit “Bashkë fitojmë” për bashkinë e Tiranës Belind Këlliçi pranon se në humbjen e tij në garën e 14 majit, ndikoi mungesa e organizimit dhe komunikimit me qytetarët.
“Ne kemi pasur problematika të caktuara qoftë në aspektin organizativ, qoftë në aspektin e komunikimit me qytetarët sepse ajo valë e reagimit që pritej se do të duhej të neutralizonte këtë blerje vote, apo manipulim të procesit zgjedhor nuk ndodhi nga qytetarët. Pra, ka një ngërç. Kështu që edhe ne do të duhet të gjejmë gjuhën e komunikimit patjetër në mënyrë permanente me çdo qytetar, në Tiranë dhe në gjithë Shqipërinë”, – tha Këlliçi.
Ai apeloi që demokratët duhet të ulen me njëri tjetrin duke filluar që nga drejtuesit.
“Në këtë moment do të duhet që gjithë lidershipi, nga kupola deri në celulën më të fundit të seksioneve të degëve të PD do të duhet të ketë një reagim për këtë situatë. Do të duhet që të ulen të gjitha palët me njëri – tjetrin për të parë të vërtetën në sy, për t’i lënë demokratët të vendosin vetë dhe për të pasur një drejtim të caktuar” ,– tha Këlliçi.
m.b/dita
