Policia e Tiranës ka bërë me dije se 18-vjeçari Axel Hoxhaj, një prej autorëve të sherrit që ndodhi tre ditë më parë në Tiranë, ku mbeti i vrarë 20-vjeçari Stiven Toshkëzi, është dorëzuar në polici. I dyshuari si vrasësi i adoleshentit për motive të dobëta, u dorëzua pas negociatave të policisë me familjarët dhe këta të fundit me të riun. Mësohet se Hoxhaj është shprehur paraprakisht se nuk ka dashur që ta vrasë Toshkëzin, por në përleshje e sipër me grushte, i është dashur në gjaknxehtësi që të mbrohet, duke përdorur armën e ftohtë. Por ai nuk ka shpjeguar dot faktin përse mbante një armë të ftohtë me vete dhe rrethanat se i ka shkuar apo e ka pritur viktimën i pari, pra nën dyshimin e një krimi të paramenduar. Prokuroria po përgatit dosjen penale për masë sigurie, ku do kërkojë ‘arrest me burg’, për akuzat e vrasjes me dashje, në bashkëpunim dhe armëmbajtje pa leje.
Kujtojmë se ngjarja ndodhi më datë 18 prill, rreth orës 00:15, në rrugën “Skënder Sallaku”, pranë gjimnazit “Partizani”. Dy të rinjtë Ensi Maze dhe Axel Hoxhaj, pas sherrit me 19-vjeçarin që punonte montazhier në televizion, e kanë kanë goditur atë me mjet prerës, teksa si pasojë ndërroi jetë në spital. Më herët Enzi Maze, i arrestuar pak orë pas krimit, ka thënë para grupit hetimor se shkak i sherrit mes të rinjve ishte bërë një vajzë që i pëlqente Axelit, e cila ishte e dashura e viktimës dhe ky i fundit i kërkonte që të mos e ngacmonte më. Maze ka thënë se ai studion në Holandë dhe është kthyer në familje për disa ditë pushimi, kur e kontaktoi Hoxhaj dhe ‘i qau’ hallin që kishte. Autori i ka thënë se Toshkëzi i kishte marrë vajzën që donte dhe e kishte dhunuar, ndaj do të shkonin për t’u sqaruar. Maze pretendoi se nuk dinte asgjë për planin e shokut të tij dhe se në vendngjarje pati përleshje mes tyre dhe më tej erdhi sulmi me thikë.
“Si rezultat i presionit të kontrolleve të pandërprera nga shërbimet e Policisë dhe falë negociatave të vazhdueshme me familjarët, ditën e sotme, në DVP Tiranë, është vetëdorëzuar shtetasi Axel Hoxhaj., 18 vjeç, banues në Tiranë. Materialet i kaluan Prokurorisë së Rrethit Gjyqësor Tiranë, për veprime të mëtejshme procedurale”, thuhet në njoftimin e Policisë së Tiranës. Do të pritet edhe marrja në pyetje më e detajuar e Hoxhajt, për të kopsitur dosjen me aktet për masë sigurie.
