Është shkrumbuar nga flakët makina e pedagogut dhe pronarit të medias “Tv Rozafa”, Gasper Kokaj gjatë orëve të natës në qytetin e Shkodrës.
Mjeti i shkrumbuar ishte tip ‘Land Rover’ i parkuar në zonën e Dollarit të Shkodër. Kokaj ka qenë në vitin 2013 kandidat për deputet në partinë Republikane.
Djegia ka qenë e qëllimshme, teksa në pamjet e kamerave të sigurisë dallohet një person i cili afrohet pranë mjetit fouristradë dhe i vë flakën në pjesën e përparme.
Policia po punon për identifikimin dhe lokalizimin e autorëve. Pronari Kokaj u ka thënë hetuesve se nuk ka konflikte dhe se nuk ka dyshime për asnjë person.
Vetë pronari i mjetit, në dëshminë e dhënë në Polici ka thënë se nuk ka patur konflikte dhe nuk e njeh autorin apo të ketë dyshime për ngjarjen. “Nuk kam konflikte, nuk di kush mund ta ketë bërë”, është shprehur ai.
Sipas forcave blu, mjeti tip “Land Rover” është djegur gjatë natës në rrugën “Vaso Kadia”. Aktualisht po vijojnë hetimet nën drejtimin e Prokurorisë pranë Gjykatës së Rrethit Gjyqësor Shkodër, me qëllim zbardhjen e rrethanave të ngjarjes, identifikimin dhe kapjen e autorit.
Njoftimi i Policisë:
Gjatë natës është djegur pjesërisht automjeti tip “Land Rover”, i cili ka qenë i parkuar në rrugën “Vaso Kadia”. Nga verifikimet paraprake ka rezultuar se automjeti është në pronësi të TV Rozafa. Vijojnë hetimet, nën drejtimin e Prokurorisë pranë Gjykatës së Rrethit Gjyqësor Shkodër, me qëllim zbardhjen e rrethanave të ngjarjes, identifikimin dhe kapjen e autorit.
j.l./ dita
