Në podcastin “N’xhiro me Syçin”, publicisti Ilir Demalia u shpreh me tone të ashpra për kulturën e papërgjegjshme dhe mungesën e prodhimit në Shqipëri, duke kritikuar si qytetarët ashtu edhe oligarkët e lidhur me pushtetin.
“Shqiptari tipik hedh plehra, flamurin e ka në makinë dhe mendon se është patriot. Por ku është dashuria për ambientin, për lumin, për pemën?”, tha Demalia, duke e konsideruar këtë sjellje shenjë të mungesës së kulturës qytetare.
Ai theksoi se oligarkët shqiptarë nuk kanë krijuar marka apo prodhime vendase, por vetëm kanë përfituar nga lejet, koncesionet dhe monopole të dhëna nga politika. “Nuk ka një prodhim Made in Albania. Vendi shihet thjesht si ta mjelin. Marrin leje, ndërtojnë, pasurohen, dhe pastaj dalin si bilionerë nëpër revista si Forbes. Por në fakt nuk kanë dhënë asgjë për këtë vend,” u shpreh ai.
Sipas Demalias, fenomeni shkon përtej ekonomisë, duke u shndërruar në problem kulturor dhe shoqëror. “Ne e ngatërrojmë lirinë me vanitetin. Njëri bën dasmën me helikopter në fshat, tjetri ngre kioska pa leje. Kjo nuk është liri, është anarki,” tha ai.
