Në episodin e fundit të emisionit “N’xhiro me Syçin”, gazetari dhe publicisti Ilir Demalia nuk u përmbajt përballë realitetit politik dhe shoqëror në Shqipëri. I ftuar në bisedë ishte Eduard Prodani, por në një pjesë të emisionit vëmendja u dominua nga një shpërthim emocional i vetë Demalias. Mes kritikash të ashpra ndaj klasës politike, arrogancës së pseudo-intelektualëve dhe reminishencave të mendësisë komuniste, ai nuk kurseu askënd.
Për Demalian, mungesa e një reflektimi të thellë shoqëror dhe e pjekurisë politike është thelbi i krizës sonë.
“Këto që dalin sot si cuba… Po ku ishit mor zotëri, ju që sot shisni veten si antikomunistë?!” – akuzoi ai, duke iu referuar figurave publike, konkretisht Tomor Alizotit që ndërtojnë autoritet mbi një të kaluar të dyshimtë apo të deformuar.
Në një moment të tensionuar, Demalia ironizoi ashpër një figurë të njohur publike:
“Ky që thotë ‘do t’ju hamë të gjallë’… çfarë hëngre në Berat? Katastrofë! Në Elbasan? Edhe më keq! Çfarë do të hash ti të gjallë?! Këto janë fjalë që vetëm të çakërdisin nervat.”
Ai vazhdoi duke sulmuar arrogancën e atyre që e quajnë veten diplomatë, por që flasin me “një gjuhë të drunjtë dhe agresive”. Demalia, i njohur për qëndrimet e tij të drejtpërdrejta dhe shpeshherë të pakompromis, shprehu zhgënjimin e thellë ndaj një shoqërie që ende nuk pranon të ulet dhe të reflektojë.
“Njeriu mund të lexojë të gjithë bibliotekën e Aleksandrisë, por çfarë krijon ai? Sa mendim krijues ka? Nëse mbas 35 vitesh mburresh vetëm me biografi, je i mbaruar,” u shpreh ai, duke vënë në dyshim vlerat e vërteta që duhet të ndërtojnë një figurë publike në kohët moderne.
