Ish-prokurorja e Krimeve të Rënda, Elisabeta Imeraj thotë se transkriptet e publikuara për 21 janarin e vitit 2011 kur Kryeministria u sulmua nga mbështetësit e PS, nuk e rihapin dot një gjykim tashmë të kryer.
Në emisionin “Review” në Euronews Albania, Imeraj nënvizoi nuk mund të rihetohet një çështje për të cilën gjykata ka marrë vendim dhe ky vendim ka marrë formë të prerë.
“Nëse ka dhe burojnë veprime të tjera hetimore, që propozohen, qoftë edhe nga ky audiopërgjimi që disponon zoti Artan Hoxha, që mund të merret, të analizohet, detajohet dhe i jepet rruga për të vijuar në hetime, neni 449, nuk afekton pjesën e gjësë së gjykuar që lidhen me subjektet që kanë marrë një vendim.
Pra, nuk mund të ngrehet një akuzë e re, për subjekte të cilat drejtësia i ka dënuar për atë fakt.
Por nëse në raport me hetimet që po zhvillohen për gjetjen e autorësisë për vrasjen e Aleks Nikës, dalin detaje që e lidhin me këtë, në tërësi, nuk pengon më njeri që të vazhdojnë hetimet në këtë aspekt”, theksoi ajo.
Imeraj ngriti pyetjen se përse duhet të tejçohet me forcë nga politika, një ngjarje që ka ndodhur 12 vite më parë.
“Ajo që ne duhet të ngremë zërin në radhë të parë, është që, përse është e nevojshme, që në 2023-shin, për një ngjarje të ndodhur në 2011, të tejçohet me forcë nga politika. Për çfarë arsye? Jemi tashmë disa vite, që ecim në ujërat e reformës në drejtësi, të institicioneve të reja të krijuara dhe shohim ministrin e Drejtësisë që flet për rihapje të dosjes, për dosje që mbahen peng, për prokurorë që bien nga vettingu.
Vetë iniciativa që ndërmerret, nuk ka të bëjë në thelb me hetimin e 21 janarit. Përse iu krijon një farë terrori edhe atyre prokurorëve që e kanë dosjen në dorë dhe që mund ta marrin procedurialisht. Unë e shoh shumë të thjeshtë këtë”, theksoi ajo.
Imeraj thotë se çdo prokuror është i pavarur që të kryejë një hetim në lidhje me 21 janarin, duke iu referuar audiopërgjimit të publikuar, ku ish-komandanti i gardës, Ndrea Prendi komunikonte dhe i jepte urdhra vartësve të tij.
Ajo u shpreh se kjo mund të realizohet, bazuar në ndryshimet e ndodhura në Kodin e Procedurës Penale.
“Me ndryshimet e ndodhura në Kodin e Procedurës Penale, çdo prokuror është i pavarur. Si i tillë, i lind edhe e drejta një prokurori të pavarur, dje që kur ka dalë audiopërgjimi, që kryesisht të nisë një hetim dhe të thotë që në tërësinë e elementëve të ndodhur në këtë historinë e 21 janarit, ka mbetur pa u hetuar ai zinxhiri.
Pra nuk është e nevojshme të bëhet gjithë kjo ekspoze politike. Nuk ka pse t’i prezantohet publikut srejtesia e re si një drejtësi që mban peng një dosje. Nuk mund të themi edhe në 2023-shin pas Reformes, po na mbahen peng dosje”, theksoi ajo.
j.l./ dita
