4 persona janë pyetur dhe një është identifikuar si i dyshuar nga policia e Kosovës, pas një incidenti që ka ndodhur natën e së enjtes në Lagjen e Boshnjakëve në veri të Mitrovicës.
Disa persona të komunitetit serb në këtë zonë kanë ngjitur disa fletushka edhe në përmendoren e një dëshmori. Kjo ka sjellë edhe reagimin e disa qytetareve shqiptarë, ku janë dëmtuar disa makina me tabela të Serbisë.
Nga ana tjetër iniciatori i ngjitjes së parullave ka dënuar rastin kur kjo gjë është bërë në vende jo të duhura.
“Kur i kemi dhënë fletushkat, kemi dhënë edhe udhëzime të qarta se askush nuk guxon për t’i ngjitur ato në shenjat e komunikacionit, në vitrinat e lokaleve pa lejen e pronarit, nëpër dyert e banesave, përmendore. Unë me këtë rast dënoj një ngjitje të tillë në përmendore. Do të thotë, nëse nuk lejon mbi përmendoren tënde, atëherë nuk guxon të prekësh as përmendoren e huaj, sepse të gjitha përmendoret duhet të jenë të mbrojtura nga ana e të gjithë neve dhe kjo duhet të jetë porosia e qartë dhe jo arsye për krijimin e tensioneve”, tha Aleksandar Arsenijeviç, lideri i Iniciativës Qytetare Mbijetesa serbe.
Arsenijeviç e hedh faji tek administrata komunale e Mitrovicës së Veriut.
“Ne shprehim dyshime për mundësinë që dikush me qëllim, respektivisht dikush nga kabineti i kryetarit Atiç, si për shembull Visar Syla apo dikush ngjashëm me të, i cili dëshiron tensione njëjtë si Vetëvendosja, tensione dhe përleshje në veri, ka mundur ta bëjë një gjë të tillë”, u shpreh ai.
Edhe pse kishte grumbullim të vogël të qytetarëve nga të dyja komunitetet, nuk pati ndonjë incident, pasi policia ka ndërhyrë dhe të gjithë janë shpërndarë qetësisht.
j.l./ dita
