Investimet për modernizimin e shërbimeve mjekësore në spitalet e Qendrës Spitalore Universitare “Nënë Tereza” (QSUT) do të vijojnë edhe përgjatë këtij viti.
Autoritetet e dikasterit të Shëndetësisë bëjnë me dije se QSUT do të vijojë të jetë një kantier ndërtimi, ku gjatë këtij viti, do të nisin punimet edhe në Spitalin e Kardiokirurgjisë, për të vijuar me punimet në Spitalin Psikiatrik.
Ndërkohë që paralelisht do të vijohet edhe me investime që kanë të bëjnë jo vetëm me përmirësimin e infrastrukturës, por edhe me pajisjet biomjeksore, me rritjen e cilësisë së teknologjisë dhe inovacionit, nëpërmjet të cilave synohet që të rritet edhe cilësia e shërbimeve që do të ofrohen ndaj qytetarëve.
Aktualisht punimet po vijojnë për modernizimin e Spitalit të Pediatrisë, ku pas përmbylljes së fazës së parë të investimit të kryer me tre shërbime të rëndësishme, si: Shërbimi i Urgjencës, Shërbimi i Reanimacioni, si dhe sallat e operacionit për ndërhyrjet kirurgjikale infantile, po vijon faza e dytë e investimit që përfshin rehabilitimin e plotë të Pediatrisë së Përgjithshme dhe të asaj të Specialiteteve. Faza e dytë e këtij projekti konsideron të gjithë rehabilitimin dhe përforcimin nga themelet të të gjithë strukturës të Pediatrisë së Përgjithshme, ku janë 120 shtretër dhe përfshihet shërbimi i onko-hematologjisë, dializës, pneumologjisë, etj. Me përfundimin e fazës së dytë kompletohet i gjithë korpusi i Spitalit Pediatrik në QSUT.
p.k\dita
