Kandidati për deputet i koalicionit “Djathtas për Zhvillim” për Qarkun Vlorë, Edvin Kulluri ishte i ftuari i radhës në podcastin “N’xhiro me Syçin”, një emision nga Ilir Demalia.
Në një bisedë të hapur dhe pa filtra, Kulluri sjell reflektime të forta mbi rrugëtimin e së djathtës në këto 34 vite, duke mos kursyer kritika për gabimet, kompromiset dhe sidomos për turpet që, sipas tij, kanë shoqëruar shpesh këtë krah politik.
“Kur kujtoj figurat që vinin nga drejtësia komuniste dhe u bënë drejtues të institucioneve kushtetuese, nuk them që PD-ja ka bërë gabime – ka bërë turpe,” thotë ai me një ton të prerë.
Kulluri flet për mungesën e drejtësisë së pronës, për një proces të çrregullt dhe shpeshherë të padrejtë, ku “33 mijë dosje mbetën të paprekura, ndërsa ato që sillnin përfitime për njerëz të lidhur me pushtetin, ecën me përparësi.” Në këtë episod, ai ndalet edhe te balanca mes liberalizmit dhe konservatorizmit, duke pohuar se “liberalët dhe konservatorët bien dakord për tregun e lirë, por ndahen te komuniteti, te familja dhe te vlerat që ruajnë kombin.”
j.l./ dita
