Një armë kimike e përdorur që në Luftën e Parë Botërore është vënë në përdorim nga autoritetet në Gjeorgji për të shtypur protestat kundër qeverisë në vitin 2024, sipas një investigimi të BBC-së.
Ekspertë të armëve kimike, informatorë nga policia dhe mjekë kanë zbuluar për median britanike se është përdorur substanca “Camite”, e cila ishte përdorur nga Franca kundër Gjermanisë gjatë Luftës së Parë Botërore.
Ekzistojnë shumë pak të dhëna për përdorimin e saj vitet pasuese, por vlerësohet se ajo është tërhequr nga qarkullimi në vitet 1930, për shkak të shqetësimeve mbi efektet e saj afatgjata. Gazi CS, shpesh i njohur si “gaz lotsjellës”, ishte zëvendësuesi i kësaj arme kimike.
“E ndjeje ujin të të digjte”, tha njëri prej protestuesve, duke përshkruar efektin e topave të ujit që u drejtuan ndaj tij dhe të tjerëve në rrugët e kryeqytetit Tbilisi. Sipas tij, ishte një ndjesi që nuk mund të largohej menjëherë.
Protestuesit që morën pjesë në demonstrata raportuan vështirësi në frymëmarrje, kollë dhe të vjella që zgjatën për javë të tëra.
Autoritetet gjeorgjiane mohuan gjetjet e investigimit dhe i cilësuan ato si “të pakuptimta”. Ata deklaruan se policia ka vepruar në mënyrë të ligjshme në përgjigje të “veprimeve të paligjshme të kriminelëve të dhunshëm”.
j.l./ dita
