Marina e Gardës Revolucionare të Iranit njoftoi sot se kishte mbyllur Ngushticën e Hormuzit deri në njoftim të mëtejshëm. Menjëherë pas kësaj, Shtetet e Bashkuara nisën një raund të ri bombardimesh të pozicioneve iraniane në zonën më të gjerë të Ngushticës, duke bërë që Irani të përgjigjej me sulme me raketa balistike ndaj fqinjëve të saj.
Marina Iraniane tha të shtunën vonë se kishte qëlluar me të shtëna paralajmëruese ndaj një anijeje që dyshohet se ishte përpjekur të kalonte nëpër Ngushticë duke ndjekur një rrugë të paautorizuar. Sipas Iranit, anija kishte çaktivizuar transponderin e saj, i cili tregon vazhdimisht pozicionin e saj.
Mediat e huaja raportuan se, anija u godit nga një raketë lundrimi dhe se ajo injoroi thirrjet e autoriteteve iraniane. SHBA-të iu përgjigjën këtij incidenti duke goditur pozicione në Shirik, Bandar Abbas dhe Minab. Mbrojtja ajrore në Teheran u aktivizua gjithashtu.
Ky është sulmi i tretë amerikan ndaj Iranit gjatë javës së fundit, i cili u konfirmua edhe nga CENTCOM, Komanda Qendrore e SHBA-së. Sipas televizionit shtetëror iranian, pas këtij episodi u vendos që të mbyllet Ngushtica e Hormuzit derisa të ndalet ndërhyrja e SHBA-së në rajon.
Gjithashtu nënvizohet se asnjë anije nuk do të lejohet të kalojë nëpër Ngushticë dhe se nëse armiku e përdor incidentin si pretekst për të nisur sulme të reja kundër Republikës Islamike, atëherë do të marrë një përgjigje të ashpër. Ndërkohë, Omani propozoi dy rrugë të ndara përmes Ngushticës gjatë bisedimeve me Iranin në Muscat. Teherani kishte shprehur tashmë kundërshtimin e tij ndaj propozimit.
j.l./ dita
