Ish-ministrja e Financave Anila Denaj është paraqitur këtë të premte në Prokurorinë e Posaçme Anti Korrupsion.
Mësohet se ajo është thirrur për t’u pyetur si person në dijeni për koncesionin e sterilizimit të pajisjeve mjekësore.
Në lidhje me këtë koncesion kanë dëshmuar në SPAK në korrik të vitit 2022 edhe ish-ministri i Shëndetësisë, Ilir Beqaj dhe ish-zëvendësministri Shëndetësisë, Klodian Rrjepaj.
SPAK ka nisur hetimet në lidhje me dy tendera në shëndetësi, për sterilizimin dhe check-up. Koncesioni i sterilizimit është denoncimi i parë i bërë në SPAK nga Nisma Thurje më 23 dhjetor të 2019, tre ditë pas themelimit të Prokurorisë së Posaçme.
Kujtojmë se Denaj mori postin e Ministres së Financave dhe Ekonomisë në dhjetor të vitit 2018, duke zëvendësuar në këtë detyrë Arben Ahmetajn. Ajo qëndroi në këtë detyrë deri në shtator të vitit 2021, kur u zëvendësua nga ministrja aktuale e Financave, Delina Ibrahimaj.
