Janë mbyllur edhe ndeshjet e dyta të tre prej grupeve në mbrëmje, ku spikatën fitorja e thellë e portugezëve, por edhe ‘rilindja’ e italianëve.
Portugalia siguroi fitoren e dytë radhazi në grupin J me rezultatin e thellë 0-6. Gjithçka u vendos në pjesën e parë, pasi Luzitanët realizuan katër gola të shpejtë. Sërish protagonisti kryesor ishte Cristiano Ronaldo. Pesë herë fituesi i Topit të Artë, shënoi dy gola të bukur. Fillimisht në minutën e nëntë pas një aksioni të bukur duke finalizuar me finte. Golin e dytë e shënoi Joao Felix. Sulmuesi i Chelsea realizoi me kokë pas një harkimi perfekt të Bernardo Silvës. Ky i fundit realizoi golin e tretë në minutën e 18′. Mesfushori i Man City realizoi një gol mjaft të bukur me kokë pas harkimit perfekt të Joao Palhinha. Në minutën e 31′, CR7 shënoi edhe golin e katërt, i dyti personal. 38-vjecari konfirmon formën e e tij të mirë dhe rëndësinë që ka në Kombëtare. Pas asistimit të Bruno Fernades e pati të lehtë për të shënuar. Në pjesën e dytë Portugalia gjeti edhe golin e pestë me Otavion në minutën e 77′. Mesfushori i Portos shënoi pas asistimit të Leaos. Ky i fundit humbi një mundësi të artë për të shënuar në minutën e 85′, pasi shpërdoroi një penallti, e cila u prit nga portieri. Megjithatë, pas katër minutash, sulmuesi i Milanit realizoi një gol spektakolar. Pas këtij triumfi Portugalia ngjitet e vetme në vendin e parë me 6 pikë, duke lënë pas Sllovakinë në vendin e dytë.
Feston edhe Italia, që triumfoi në sfidën e dytë në grupin C në transfertë përballë Maltës (0-2). Kampionët e Europës hodhën pas krahëve disfatën me Anglinë në stadiumin “Diego Armando Maradona”. Të kaltrit siguruan fitoren e parë në kualifikueset e Euro 2024. Për të besuarit e trajnerit Roberto Mancini ishte gjithçka e lehtë, teksa fitorja u vendos që në pjesën e parë. Golin e parë të takimit e shënoi sulmuesi Mateo Retegui. 23-vjecari realizoi me kokë pas një harkimit të Sandro Tonalit. Për të ishte goli i dytë në po kaq takime me Kombëtaren. Italia nuk e uli ritmin dhe gjeti edhe golin e dytë pas 12 minutash, me Matteo Pessinan. Mesfushori e pati të lehtë për ta dërguar topin në rrjetë pas një aksioni mjaft të mirë. Pjesa e parë e takimit u mbyll me rezultatin 0-2, ndërsa në fraksionin e dytë Italia menaxhoi rezultatin dhe fitoren. Pas këtij triumfi të kaltrit ngjiten në vendin e dytë me 3 pikë, po aq sa Maqedonia e Veriut.
