Prej disa ditësh, fishat për matjen e diabetit për të moshuarit mbi 65 vjeç po rimbursohen nga shteti dhe pensionistët i përfitojnë falas. Teksa ka inspektuar nga afër qendrën shëndetësore në Suk-Roskovec të Fierit, ministrja e Shëndetësisë dhe Mbrojtjes Sociale, Ogerta Manastirli ka konfirmuar vijueshmërinë e ndarjes së fishave të diabetit falas për këtë kategori. Ndërkohë që është përcaktuar edhe numri i fishave që do të rimbursohen në muaj për çdo kategori.
“Fishat e diabetit janë falas për moshën mbi 65 vjeç, ku ata me terapi orale marrin 50 fisha për 4 muaj, ndërsa ata që janë me terapi me insulinë marrin 50 fisha çdo muaj”, konfirmon mjeku i qendrës shëndetësore në Suk.Ministrja Manastirliu u ndal edhe tek shërbimet socio-shëndetësore, ku theksoi se do vijoj përfshirja e 50 psikologëve dhe punonjësve social në kujdesin parësor. “Shërbimet socio-shëndetësore janë një tjetër aspeket që ne e kemi përfshirë në programin tonë të integruar, të kujdesit shëndetësor dhe atij social me përfshirjen e 50 psikologëve dhe punonjësve social në të gjithë vendin, ku do të vijojmë edhe në këtë vit, me rritjen e numrit të punonjësve social dhe psikologëve”,- u shpreh Manastirliu.Ambulanca Suk ofron shërbim shëndetësor për 4500 banorë. Rikonstruksioni i kësaj ambulance është bërë nëpërmjet mekanizmit të bashkëfinancimit me bashkinë Roskovec dhe projektit “Shëndet për të Gjithë”, në kuadër të bashkëpunimit ndërmjet qeverisë zvicerane dhe asaj shqiptare në sektorin e shëndetësisë. Në qarkun e Fierit janë 30 qendra shëndetësore dhe ambulance që janë rehabilituar dhe në Bashkinë e Roskovecit janë rehabilituar sipas standardeve më të mira 5 të tilla. Pas rehabilitimit të 340 qendrave shëndetësore, gjatë këtij viti fillon rikonstruksioni i 60 qendrave shëndetësore dhe ambulancave të reja në të gjithë vendin nga veriu në jug.
