Melanoma është një nga llojet më të rrezikshme të kancerit të lëkurës, që zhvillohet në qelizat ku prodhohet melanina, pigmenti që përcakton ngjyrën e lëkurës sonë.
Për të shmangur pasojat e rënda që kjo sëmundjes sjell, autoritetet e shëndetit publik vënë theksin tek domosdoshmëria e njohjes së simptomave të para të këtij lloj kanceri, çka mundëson zbulimin dhe trajtimin e tij, përpara se sëmundja të përhapet.
Nëse zbulohet në kohë, melanoma mund të trajtohet suksesshëm.
Melanoma mund të zhvillohet në të gjithë trupin, por më shpesh ajo zhvillohet në zonat që kanë një përqindje të lartë ekspozimi në diell, si: shpina, këmbët, krahët dhe fytyra. Mund të ndodhë që ajo të zhvillohet në sipërfaqe më pak të ekspozuara ndaj diellit, si: shputa e këmbës, palma e duarve, thonjtё, membranat mukoze të organeve kavitare si goja, rektumi, vagina etj. Jo rrallë mund të kemi shfaqje të kësaj patologjie malinje edhe në sy, e quajtur ndryshe melanoma okulare. Këto melanoma të fshehura janë më të zakonshme në individët më lëkurë të errët.
Ndonëse më rrallë, melanoma mund të formohet gjithashtu edhe në organet e brendshme, si përshembull zorrët.
Edhe pse të gjithë mund të preken nga kjo sëmundje, janë disa kategori që kanë faktorë risku të shtuar për të zhvilluar melanomën.
Cilët janë personat më të rrezikuar nga kjo sëmundje?
-Lëkurë të bardhë
Të kesh më pak pigment melanine në lëkurë do të thotë të kesh më pak mbrojtje ndaj rrezeve UV. Nëse keni flokë biondë apo të kuq, quka apo digjeni shpejt nën rrezet e diellit, ju keni më tepër mundësi të zhvilloni melanoma.
–Djegie nga dielli
Një apo më shumë episode të djegies së lëkurës nga rrezet e diellit në fëmijërinë tuaj mund të rrisin rrezikun e melanomës në moshën adulte. Po ashtu edhe ekspozimi i tepruar ndaj rrezeve ultravjollcë të diellit, e rrit rrezikun e zhvillimit të kancerit të lëkurës.
– Nishane të shumta
Të paturit më shumë se 50 nishane të zakonshme në trup tregon një rrezik të lartë për të zhvilluar melanomë. Gjithashtu, edhe ekzistenca e nishaneve të pazakonta tregon për një tendencë ndaj mundësisë së zhvillimeve malinje në lëkurë.
–Histori familjare
Nëse një i afërm, prind, fëmijë apo vëlla ka patur melanomë, individi ka një mundësi më të madhe për ta zhvilluar atë.
-Sistem imunitar të dobësuar
Në këtë kategori futen të gjithë pacientët me HIV/AIDS dhe ata që i janë nënshtruar një transplanti.
p.k\dita
