Kandidati për kryetar të Partisë Demokratike, Gjergj Hani ka votuar ditën e sotme rreth orës 10:00.
Pas votimit, Hani ka dhënë një prononcim për gazetarët, ku i ka bërë thirrje demokratëve që të dalin masivisht në votime.
Gjergj Hani: Ju falenderoj ju për prezencën tuaj që po pasqyroni këtë ngjarje të jashtëzakonshme në jetën e PD-së. I ftoj të dalin të votojnë masivisht demokratët pasi është e drejtë e tyre për të shprehur vullnetin dhe për të pasur moralin duke filluar nga nesër për të kërkuar llogari. Pjesëmarrja është e domosdoshme dhe vlerë e demokracisë, ajo që duhet t’i kthejmë kësaj partie.
I pyetur se pse nuk ka zhvilluar fushatë, Hani ka thënë se mundësitë nuk ishin të barabarta dhe shprehet i bindur se ai ka përcjellë mesazhin e tij për një PD ndryshe.
“Gjergj Hani i është përmbajtur vendimeve të kryesisë së partisë që vendosi tonet me të cilat d të zhvillohej kjo fushatë. Mundësitë nuk ishin të barabarta. Jam i bindur se Gjergji ka përcjellë mesazhin e tij për një PD ndryshe”, tha ai.
Përsa i përket vendimit të Këshillit Kombëtar të PD-së për anulimin e zgjedhjeve të 29 Korrikut për kreun e Partisë Demokratike, Hani ka thënë se nuk ka vlerë ligjore, teksa shtoi se për këtë çështje do të flasë drejtësia.
Gjergj Hani: Vendimi i marrë nga Bardhi, nuk ka asnjë vlerë ligjore dhe asnjëlloj firme, i bërë online me Zoom, do të falsë drejtësia dhe ne i pranojmë vendimet e drejtësisë. Të përpiqemi që të ketë mbarëvajtje dhe të mos e thyejmë këtë heshtje zgjedhore. Fitojmë të gjithë, Fiton PD sot.
