Gjatë legjislaturës së 10-të të Kuvendit të Shqipërisë, e cila përfundoi zyrtarisht më 3 korrik 2025, pritej shqyrtimi nga ana e Parlamentit i dy kandidaturave të propozuara nga Këshilli i Ministrave për postin e Kryetarit të Komisionit të Prokurimit Publik: z. Jonaid Myzyri dhe z. Kreshnik Ternova.
Në mars 2025 Këshilli i Ministrave njoftoi se dy kandidatët e kualifikuar nga Komisioni Ad-Hoc janë z. Jonaid Myzyri me 91 pikë dhe z. Kreshnik Ternova me 82 pikë.
Në mbledhjen e Këshillit të Ministrave datë 12.3.2025, është miratuar projektvendimi “Për propozimin Kuvendit të Republikës së Shqipërisë të kandidatëve për kryetar të Komisionit të Prokurimit Publik”.
Procedura e mëtejshme për emërimin ndiqet nga Kuvendi i Republikës së Shqipërisë, por ky i fundit nuk ka mundur të shqyrtojë kandidaturat brenda përfundimit të legjislaturës.
Rregullorja e Kuvendit të Shqipërisë përcakton se me mbylljen e legjislaturës së punimeve të Kuvendit, projektaktet e depozituara për shqyrtim e miratim, që për arsye të ndryshme nuk kanë arritur të miratohen në seancë plenare, i kthehen nismëtarit.
Kjo do të thotë se kandidaturat e propozuara nuk janë më në fuqi dhe procesi për emërimin e Kryetarit të Komisionit të Prokurimit Publik duhet të nisë nga e para.
Qeveria do të duhet të propozojë sërish kandidatë, që mund të jenë të njëjtët apo të ndryshëm, sipas vlerësimit të saj.
Si rrjedhojë, procesi i emërimit të Kryetarit të Komisionit të Prokurimit Publik mbetet i hapur dhe do të duhet të trajtohet nga legjislatura e re e Kuvendit, e cila do të nisë punimet në shtator 2025.
