Komisioni i Ankesave të Sanksioneve vendosi të rrëzojë me shumicë votash ankimin e Partisë Demokratike për përjashtimin nga zgjedhjet vendore të 14 majit të kandidatit të Partisë Socialiste në Mallakastër, Qerim Ismailaj.
Në shkurt të këtij viti, Gjykata e Posaçme kryetari i Bashkisë së Mallakastrës u gjet fajtor për akuzën e “falsifikimit të formularëve”. Ai u dënua me 6 muaj burg, dënim që u ul në 4 muaj për shkak të gjykimit të shkurtuar.
Në përfundim, dënimi u konvertua në Shërbim Prove, duke detyruar kryebashkiakun në kryerjen e 40 orëve punë të papaguar në interes të publikut. Referuar vendimit, GJKKO e vlerësoi të bazuar akuzën e SPAK, se Ismailaj nuk kishte deklaruar në formularin e dekriminalizimit një dënim fajësie nga drejtësia greke 23 vjet më parë.
Ismailaj paralajmëroi vazhdim të betejës ligjore. “Vendimi i dhënë sot nga gjykata nuk sjell asnjë pasojë ligjore lidhur me ushtrimin e funksionit tim në shërbim të qytetarëve mallkastriotë në pozicionin e kryetarit të bashkisë, ashtu si edhe në karrierën time në të ardhmen. Duke qenë i bindur në pafajësinë time të plotë, por edhe duke ndjekur të gjitha procedurat për respektimin e të drejtave të njeriut, do të vazhdoj betejën në të gjitha shkallët e sistemit të drejtësisë”, tha Ismailaj.
Para se të merrej i pandehur nga SPAK, Ismailaj u akuzua nga Partia Demokratike për fshehje të dënimit të tij në Greqi. Pas zgjedhjes së tij në krye të Bashkisë Mallakastër në zgjedhjet vendore të vitit 2019, Komisioni Qendror i Zgjedhjeve e konfirmoi në detyrë, vendim që u la në fuqi edhe nga Komisioni i Ankimimeve dhe Sanksioneve.
o.j/dita